D Gukesh: గుకేష్‌పై ఉద్దేశపూర్వకంగానే డింగ్ ఓడిపోయాడు.. రష్యన్ చెస్ ఫెడరేషన్ హెడ్ సంచలన ఆరోపణలు
ఈ వార్తాకథనం ఏంటి
చెస్ ప్రపంచ ఛాంపియన్‌షిప్‌లో భారత ఆటగాడు గుకేశ్‌ అద్భుత ప్రదర్శన కనబరచాడు. డిఫెండింగ్‌ ఛాంపియన్‌ డింగ్ లిరెన్‌ను ఓడించి ప్రపంచ ఛాంపియన్‌గా నిలిచాడు. 14వ రౌండ్‌లో లిరెన్‌ చేసిన ఘోర తప్పిదాన్ని గుకేశ్‌ పూర్తిగా సొమ్ము చేసుకుని విజయం సాధించాడు. అయితే, ఈ ఫలితంపై రష్యా చెస్ ఫెడరేషన్ సంచలన ఆరోపణలు చేసింది. లిరెన్‌ అనుకోకుండా ఓడిపోలేదని, ఉద్దేశపూర్వకంగానే ఓడిపోయాడని వ్యాఖ్యానించింది.
వివరాలు
ఈ అంశంపై అంతర్జాతీయ చెస్ ఫెడరేషన్ (ఫిడే) ప్రత్యేక విచారణ చేపట్టాలి
''ఈ మ్యాచ్‌ ఫలితం చెస్ అభిమానులు, నిపుణులను ఆందోళన చెందించే విధంగా ఉంది. ఉత్కంఠభరిత పోరులో చైనీస్‌ ఆటగాడి చర్యలు అనుమానాస్పదంగా ఉన్నాయి. లిరెన్‌ ప్రస్తుత స్థితిలో ఓడిపోవడం అసాధ్యమైన విషయం. కానీ, అతడు చేసిన తప్పిదం అనేక సందేహాలను కలిగిస్తుంది. ఇది ఉద్దేశపూర్వకంగా జరిగిందేమోనని అనిపిస్తోంది. ఈ అంశంపై అంతర్జాతీయ చెస్ ఫెడరేషన్ (ఫిడే) ప్రత్యేక విచారణ చేపట్టాలని మా అభిప్రాయం'' అని రష్యా చెస్ ఫెడరేషన్ చీఫ్‌ అండ్రీ ఫిలటోవ్‌ పేర్కొన్నారు.
వివరాలు
అత్యంత పిన్న వయసు ఆటగాడిగా గుకేశ్‌
నాలుగు గంటలకుపైగా సాగిన గేమ్‌ (Gukesh-Liren Game) 58 ఎత్తుల్లో ముగిసింది. 55వ ఎత్తులో లిరెన్‌ ఏనుగును కదపడంతో గుకేశ్‌కు మంచి అవకాశమొచ్చింది. ఈ అవకాశాన్ని గుకేశ్‌ సానుకూలంగా ఉపయోగించి, వెంటనే ఆ ఏనుగును మరొక ఏనుగుతో చంపివేశాడు. లిరెన్‌ చేసిన ఈ తప్పిదం తర్వాత గేమ్‌ ఎక్కువ సమయం కొనసాగలేదు. చైనా గ్రాండ్‌మాస్టర్‌ లిరెన్‌ ఓటమిని అంగీకరించక తప్పలేదు. ఆ ప్రకారం, గుకేశ్‌ 7.5-6.5 పాయింట్లతో విజేతగా నిలిచాడు. 18 ఏళ్ల వయసులోనే ఈ విజయం సాధించి, గుకేశ్‌ చెస్ ప్రపంచ ఛాంపియన్‌గా చరిత్రలో అత్యంత పిన్న వయసు ఆటగాడిగా స్థానం సంపాదించాడు.