BCCI - BCB: బంగ్లాదేశ్ పర్యటనకు.. బీసీసీఐకి అనుమతివ్వని కేంద్రం!
ఈ వార్తాకథనం ఏంటి
భారత జట్టు ఆగస్టులో బంగ్లాదేశ్ పర్యటన చేయాల్సి ఉంది. ఇందులో భాగంగా మూడు వన్డేలు, మూడు టీ20 మ్యాచ్‌లు ఆడాల్సిన షెడ్యూల్ ఉంది. అయితే బంగ్లాదేశ్‌లో ప్రస్తుతం నెలకొన్న రాజకీయ అస్థిరతల నేపథ్యంలో ఈ పర్యటనపై అనేక సందేహాలు నెలకొన్నాయి. తాజా సమాచారం మేరకు, బీసీసీఐకి కేంద్ర ప్రభుత్వం నుంచి అనుమతి లభించలేదని తెలుస్తోంది. ఆగస్టు 17వ తేదీ నుంచి వన్డే సిరీస్ ప్రారంభం కావాల్సి ఉంది. కానీ, అక్కడ స్థానిక పరిస్థితులు ఇబ్బందికరంగా ఉండటంతో ఆటగాళ్ల భద్రత విషయంలో ఎలాంటి రాజీ పడేది లేదని కేంద్రం స్పష్టంచేసినట్లు కథనాలు వస్తున్నాయి. ఈ నేపథ్యంలో కేంద్రం నుంచి ఆమోదం వస్తేనే భారత జట్టును పంపిస్తామని బీసీసీఐ ఇప్పటికే చెప్పిన సంగతి తెలిసిందే.
వివరాలు
సంయుక్త ప్రకటనకు అవకాశాలు
ఇక బంగ్లాదేశ్ క్రికెట్ బోర్డు (బీసీబీ) మాత్రం భారత్ పర్యటనకు తాము పూర్తిగా సిద్ధంగా ఉన్నామని ప్రకటించింది. ఇప్పుడే కాకపోయినా భవిష్యత్తులో ఎప్పుడైనా ఈ సిరీస్‌ను నిర్వహించేందుకు అవకాశం కల్పించాలని బీసీసీఐని కోరింది. అయితే భారత ప్రభుత్వం అనుమతి ఇవ్వకపోతే... రెండు బోర్డులు కలిసి త్వరలో సంయుక్త ప్రకటన విడుదల చేసే అవకాశముందని సమాచారం. ఈ ప్రకటనలో సిరీస్‌ను వాయిదా వేయాలా? రద్దు చేయాలా? అనే విషయంపై స్పష్టత రానున్నట్టు తెలుస్తోంది. అంతేకాదు, పాకిస్థాన్‌తో మ్యాచుల మాదిరిగా ఈ సిరీస్‌ను తటస్థ వేదికపై నిర్వహించాలనే ఆలోచన కూడా క్రికెట్ వర్గాల్లో చర్చకు వస్తోందట.
వివరాలు
మీడియా హక్కుల అమ్మకాలపై ప్రభావం
భారత్‌తో జరిగే మ్యాచ్‌లకు ప్రపంచవ్యాప్తంగా ఎంత క్రేజ్ ఉంటుందో ప్రత్యేకంగా చెప్పాల్సిన అవసరం లేదు. ఈ సిరీస్ ద్వారా భారీ ఆదాయం పొందాలనే ఉద్దేశంతో బంగ్లాదేశ్ క్రికెట్ బోర్డు మీడియా హక్కుల అమ్మకాలపై దృష్టి పెట్టింది. షెడ్యూల్ ప్రకారం, ఆగస్టులో జరగనున్న భారత్ సిరీస్ కోసం జూలై 7, జూలై 10 తేదీల్లో బిడ్డింగ్ నిర్వహించాలని నిర్ణయించింది. అయితే ఇప్పుడు పర్యటన వాయిదా పడే సూచనలు కనిపించడంతో మీడియా హక్కుల అమ్మకాలను తాత్కాలికంగా నిలిపివేసింది.
వివరాలు
మీడియా హక్కుల అమ్మకాలపై ప్రభావం
2025 జూలై నుంచి 2027 జూన్ మధ్యకాలానికి రెండు సంవత్సరాల పాటు మీడియా హక్కులను విక్రయించాలనే యోజనలో బీసీబీ ఉన్నది. ఈ నేపథ్యంలో, జూలై 17 నుంచి 25 వరకు పాకిస్థాన్‌తో జరగనున్న మూడు టీ20ల సిరీస్ నుంచే ఈ హక్కులను అమల్లోకి తేవాలని భావించింది. కానీ ఇప్పుడు భారత్ పర్యటనపై స్పష్టత లేకపోవడంతో అన్ని ప్రణాళికలను తాత్కాలికంగా వెనక్కి తీసుకోవడం గమనార్హం.