#Viral Moment: చెలరేగిన బుడ్డోడు.. 15 బంతుల్లో హాఫ్ సెంచరీ.. ఆర్సీబీ బౌలర్లను ఆడుకున్నాడుగా..!
ఈ వార్తాకథనం ఏంటి
ఐపీఎల్ 2026 సీజన్ 16వ మ్యాచ్లో రాయల్ ఛాలెంజర్స్ బెంగళూరు (RCB), రాజస్థాన్ రాయల్స్ జట్లు తలపడ్డాయి. ఈ మ్యాచ్లో ముందుగా బ్యాటింగ్ చేసిన బెంగళూరు జట్టు నిర్ణీత 20 ఓవర్లలో 8 వికెట్ల నష్టానికి 201 పరుగులు చేసింది. దీంతో రాజస్థాన్ రాయల్స్కు 202 పరుగుల భారీ లక్ష్యం ఎదురైంది. లక్ష్య ఛేదనకు దిగిన రాజస్థాన్ జట్టుకు ఆరంభంలోనే షాక్ తగిలింది. జట్టు స్కోరు 21 పరుగుల వద్ద ఉండగానే స్టార్ బ్యాటర్ యశస్వి జైస్వాల్ వికెట్ కోల్పోయాడు. అయితే ఆ తర్వాత ఎడమచేతి వాటం యువ బ్యాటర్ వైభవ్ సూర్యవంశీ మైదానంలో విధ్వంసం సృష్టించాడు.
వివరాలు
దిగ్గజ బౌలర్లపై వైభవ్ దాడి
ఎదురుగా ఉన్నది ఎవరు అనే భయం లేకుండా వైభవ్ భారీ షాట్లతో పరుగుల వర్షం కురిపించాడు. పవర్ప్లేలోనే బెంగళూరు ప్రధాన బౌలర్లు భువనేశ్వర్ కుమార్, జోష్ హేజిల్వుడ్ బౌలింగ్ను అతను చీల్చి చెండాడాడు. కేవలం 15 బంతుల్లోనే 7 ఫోర్లు, 4 సిక్సర్ల సాయంతో 53 పరుగులు చేశాడు. అతని స్ట్రైక్ రేట్ 353.33గా నమోదవడం విశేషం. కేవలం 15 ఏళ్ల వయసులోనే ఇంత అద్భుతమైన ఇన్నింగ్స్ ఆడటంతో స్టేడియంలో ప్రేక్షకులు, క్రికెట్ విశ్లేషకులు ఆశ్చర్యానికి లోనయ్యారు.
వివరాలు
వరుస బౌండరీలతో హోరెత్తించిన ఇన్నింగ్స్
వైభవ్ ఇన్నింగ్స్ ఎంతో దూకుడుగా సాగింది. మొదటి ఓవర్లో భువనేశ్వర్ కుమార్ బౌలింగ్లో రెండు ఫోర్లు కొట్టి తన ఉద్దేశాన్ని స్పష్టం చేశాడు. మూడో ఓవర్లో అభినందన్ సింగ్ బౌలింగ్లో రెండు ఫోర్లు, ఒక సిక్సర్ బాదాడు. నాలుగో ఓవర్లో హేజిల్వుడ్ బౌలింగ్లో వరుసగా మూడు ఫోర్లు, ఒక సిక్సర్ సాధించాడు. ఐదో ఓవర్లో మళ్లీ వచ్చిన భువనేశ్వర్ బౌలింగ్లో రెండు సిక్సర్లు, రెండు ఫోర్లు బాది స్టేడియాన్ని హోరెత్తించాడు.
వివరాలు
రికార్డుల జాబితాలో వైభవ్
ఐపీఎల్ చరిత్రలో అత్యంత వేగవంతమైన అర్ధశతకం రికార్డు యశస్వి జైస్వాల్ పేరిట ఉంది (13 బంతులు). రెండో స్థానంలో కేఎల్ రాహుల్ (14 బంతులు) ఉన్నాడు. ఇప్పుడు వైభవ్ సూర్యవంశీ 15 బంతుల్లో అర్ధశతకం చేసి యూసుఫ్ పఠాన్ సరసన నిలిచాడు. విశేషం ఏమిటంటే, ఇది అతనికి రెండోసారి 15 బంతుల్లో హాఫ్ సెంచరీ కావడం. గతంలో చెన్నై సూపర్ కింగ్స్పై కూడా ఇదే విధంగా అతను మెరుపు ఇన్నింగ్స్ ఆడాడు. ఈ ప్రదర్శనతో వైభవ్ సూర్యవంశీ రాజస్థాన్ రాయల్స్ భవిష్యత్ స్టార్గా తన ముద్ర వేశాడు.
ట్విట్టర్ పోస్ట్ చేయండి
వైభవ్ సూర్యవంశీ సూపర్ ఇన్నింగ్స్..
Vaibhav Suryavanshi looks built for it.🤩#VaibhavSuryavanshi #RRvsRCBpic.twitter.com/kKOFrDVES2
— OneCricket (@OneCricketApp) April 10, 2026