Tanush Kotian: టీమిండియాకి రిక్రూట్ అయిన తనుష్ కోటియన్ ఎవరు?
బోర్డర్‌-గవాస్కర్‌ ట్రోఫీ మధ్యలో రిటైర్మెంట్‌ ప్రకటించిన సీనియర్‌ స్పిన్నర్‌ రవిచంద్రన్‌ అశ్విన్‌ స్థానంలో భారత జట్టు ప్రత్యామ్నాయ ఆటగాడిగా ముంబయి ఆఫ్‌స్పిన్నర్‌ తనుష్ కోటియన్‌ను ఎంపిక చేసింది. 26 ఏళ్ల కోటియన్ ఇటీవలే భారత్‌-ఎ జట్టు సభ్యుడిగా ఆస్ట్రేలియా పర్యటనలో పాల్గొన్నాడు. ఆ సిరీస్‌ ముగిసిన తర్వాత స్వదేశానికి తిరిగివచ్చిన అతను ప్రస్తుతం విజయ్‌ హజారే ట్రోఫీలో ముంబయి తరఫున ఆడుతున్నాడు. మంగళవారం మెల్‌బోర్న్‌ బయల్దేరనున్న కోటియన్ 26న ప్రారంభమయ్యే బాక్సింగ్‌ డే టెస్టు ముందుగా జట్టుతో కలుస్తాడు.
అశ్విన్‌ స్థానంలో ఆస్ట్రేలియాకు అక్షర్‌ పటేల్‌
సోమవారం హైదరాబాద్‌తో జరిగిన మ్యాచ్‌లో కోటియన్ 2 వికెట్లు తీయడంతో పాటు 39 పరుగులు చేసి అజేయంగా నిలిచి ముంబయి విజయానికి కీలక పాత్ర పోషించాడు. ఇప్పటి వరకు 33 ఫస్ట్‌క్లాస్‌ మ్యాచ్‌లు ఆడిన కోటియన్ 101 వికెట్లు తీసి 1525 పరుగులు చేశాడు. మొదట అనుభవజ్ఞుడైన అక్షర్‌ పటేల్‌ను అశ్విన్‌ స్థానంలో ఆస్ట్రేలియాకు పంపాలని సెలక్టర్లు భావించినప్పటికీ, అతను కుటుంబ కారణాలతో విజయ్‌ హజారే ట్రోఫీ మ్యాచ్‌లకు దూరంగా ఉండటంతో కోటియన్‌ను ఎంపిక చేసినట్లు సమాచారం.
కోటియన్ IPL అరంగేట్రం, ఆస్ట్రేలియాలో ప్రదర్శన
ఐపిఎల్ 2024 కోసం ఆడమ్ జంపా స్థానంలో కోటియన్‌ను రాజస్థాన్ రాయల్స్ ఎంపిక చేసింది. అతను తన ఏకైక ప్రదర్శనలో 24 పరుగులు చేశాడు. ఇరానీ కప్‌లో రెస్ట్ ఆఫ్ ఇండియా జట్టుపై అతని సెంచరీ చెయ్యడంతో అతడిని ఆస్ట్రేలియాలో పర్యటించిన ఇండియా A జట్టులో చోటు కల్పించారు. మెల్‌బోర్న్‌లో జరిగిన రెండో టూర్ గేమ్‌లో అతను మొదటి ఇన్నింగ్స్‌లో సున్నా పరుగులు చేసినప్పటికీ, అతను రెండో ఇన్నింగ్స్‌లో 44 పరుగులు చేసి ఒక వికెట్‌తో తీశాడు.
