Pakistan: పాకిస్థాన్‌లోని చెక్‌పాయింట్ వద్ద ఉగ్రదాడి.. 10 మంది సరిహద్దు పోలీసులు మృతి
పాకిస్థాన్‌లో మరోసారి ఉగ్రవాదులు విరుచుకుపడ్డారు. వాయువ్య ప్రాంతంలోని డేరా ఇస్మాయిల్ ఖాన్ నగరానికి సమీపంలోని పోలీస్ అవుట్‌పోస్టుపై ఉగ్రదాడి జరిగింది. ఈ దాడిలో 10 మంది పోలీసులు చనిపోయారని సంబంధిత వర్గాలు తెలిపాయి. 'తెహ్రీక్-ఇ-తాలిబాన్ పాకిస్తాన్' అనే గ్రూప్ ఈ దాడికి తాము బాధ్యులమని ప్రకటించింది. ఈ ఘటన గురువారం చోటుచేసుకుంది, సీనియర్ పోలీస్ అధికారులు ఈ దాడిని ధ్రువీకరించారు. పెద్ద సంఖ్యలో ఉగ్రవాదులు అవుట్‌పోస్ట్‌లోకి చొరబడి బోర్డర్ కాస్టబులరీ సెక్యూరిటీ ఫోర్స్ సభ్యులను మట్టుబెట్టారు.
తాలిబాన్ నాయకుడు ఉస్తాద్ ఖురేషీ హత్యకు ప్రతీకారంగా ఈ దాడి
సీనియర్ తాలిబాన్ నాయకుడు ఉస్తాద్ ఖురేషీ హత్యకు ప్రతీకారంగా ఈ దాడి జరిగినట్లు పాక్ తాలిబాన్లు చెప్పారు. ఆఫ్ఘనిస్తాన్ సరిహద్దులలోని బజౌర్ జిల్లాలో, ఇంటెలిజెన్స్ ఆధారిత సమాచారంతో పాక్ ఆర్మీ దాడులు నిర్వహించింది. ఈ దాడుల్లో ఖురేషీతో పాటు తొమ్మిది మంది మరణించారు. ఈ ప్రతీకారానికి ఉగ్రవాదులు దాడి చేశారు. పాకిస్తాన్ వాయువ్య ప్రాంతంలో ఉగ్రవాదం, దక్షిణంలో బలూచిస్తాన్‌లో వేర్పాటువాదంతో పాకిస్తాన్ పోరాడుతున్నది. వాయువ్య ఖైబర్ ఫఖ్తుంక్వా ప్రావిన్సులో పాకిస్తాన్ తాలిబాన్ల ప్రభావం కొనసాగుతోంది. వీరు తరచూ పాక్ ఆర్మీ, పోలీసులను లక్ష్యంగా చేసుకుని దాడులు చేస్తూ ఉంటారు. మరోవైపు, బలూచిస్తాన్‌కు స్వాతంత్య్రం కావాలని కోరుకునే ''బలూచిస్తాన్ లిబరేషన్ ఆర్మీ (బీఎల్ఏ)'' పాకిస్తాన్ భద్రతా బలగాలను లక్ష్యంగా చేసుకుని దాడులు చేస్తోంది.
