Mehul Choksi: బెల్జియంలో భారత్ మోస్ట్ వాంటెడ్ మహుల్ చోక్సీ.. నిర్ధారించిన యూరోపియన్ దేశం
ఈ వార్తాకథనం ఏంటి
పంజాబ్ నేషనల్ బ్యాంక్ రుణ మోసం కేసులో భారతదేశం మోస్ట్ వాంటెడ్ నిందితుల్లో ఒకరైన వజ్రాల వ్యాపారి మెహుల్ చోక్సీ ప్రస్తుతం బెల్జియంలో ఉన్నట్లు యూరోపియన్ దేశం అధికారికంగా ధృవీకరించింది.
బెల్జియం విదేశాంగ మంత్రిత్వ శాఖ ఒక ప్రకటనలో అతని ఆచూకీ తెలిపింది.
అయితే, వ్యక్తిగత కేసులపై వారు ఎలాంటి వ్యాఖ్యలు చేయబోమని స్పష్టంగా పేర్కొన్నారు.
అయినప్పటికీ, ఈ కేసు పరిణామాలను పర్యవేక్షిస్తున్నట్లు తెలియజేశారు. చోక్సీ అప్పగింతకు సంబంధించి భారత అధికారులు తమను సంప్రదించిన విషయాన్ని కూడా బెల్జియన్ అధికారులు ధృవీకరించారు.
ఇదే కేసులో సహ నిందితుడైన అతని మేనల్లుడు నీరవ్ మోడీని లండన్ నుంచి భారత్‌కు రప్పించేందుకు భారత అధికారులు తీవ్రంగా ప్రయత్నాలు సాగిస్తున్నారు.
వివరాలు
రూ.13,500 కోట్ల మేర మోసం
రూ.13,500 కోట్ల పంజాబ్ నేషనల్ బ్యాంక్ రుణ మోసం కేసులో నీరవ్ మోడీతో పాటు 65 ఏళ్ల మెహుల్ చోక్సీ కూడా ప్రధాన నిందితుడిగా ఉన్నాడు.
ప్రస్తుతానికి, అతను తన భార్య ప్రీతి చోక్సీతో కలిసి బెల్జియంలోని ఆంట్వెర్ప్ నగరంలో నివసిస్తున్నాడు.
అయితే, ప్రస్తుతం వైద్య పరీక్షల కోసం విదేశాలకు వెళ్లినట్లు సమాచారం అందుతోంది. 2018లో పంజాబ్ నేషనల్ బ్యాంక్‌కు దాదాపు రూ.13,500 కోట్ల మేర మోసం చేసినట్లు ఆరోపణలు వెల్లువెత్తాయి.
ఈ ఆరోపణల నేపథ్యంలో, మెహుల్ చోక్సీ, నీరవ్ మోడీ దేశం విడిచి పారిపోయారు.
చోక్సీ ఆంటిగ్వా-బార్బుడాకు తలదాచుకోగా, నీరవ్ మోడీ బ్రిటన్‌కు పారిపోయాడు.
వీరిని తిరిగి భారత్‌కు రప్పించేందుకు భారత ప్రభుత్వం ఎప్పటికప్పుడు ప్రయత్నాలు చేస్తోంది.
వివరాలు
వైద్యం కోసం విదేశాలకు
ఇటీవల భారత్ పర్యటనకు వచ్చిన ఆంటిగ్వా-బార్బుడా విదేశాంగ మంత్రి ఈపీ ఛెత్ గ్రీన్ మాట్లాడుతూ, మెహుల్ చోక్సీ ప్రస్తుతం తమ దేశంలో లేరని, వైద్యం కోసం విదేశాలకు వెళ్లినట్లు తమకు సమాచారం అందిందని తెలిపారు.
అయితే, చోక్సీ తమ దేశ పౌరుడేనని స్పష్టం చేస్తూ, అతనిని భారత్‌కు అప్పగించే విషయంలో ఇరు దేశాలు కలిసి పనిచేస్తున్నాయని వెల్లడించారు.