Qatar Airways flight: పక్క సీట్లో మృతదేహంతో విమాన ప్రయాణం.. ఖతార్ ఎయిర్‌వేస్ లో జంటకు ఎదురైన అనుభవం
ఈ వార్తాకథనం ఏంటి
ఖతార్ ఎయిర్‌వేస్ విమానంలో తమ సీటు పక్కనే ఒక మృతదేహాన్ని ఉంచారని, దీని వల్ల ఎదురైన అనుభవాన్ని ఓ ఆస్ట్రేలియన్ జంట మీడియాకు వెల్లడించింది.
వెనిస్‌లో సెలవులు గడిపేందుకు మిషెల్ రింగ్, జెన్నిఫర్ కోలిన్‌లు మెల్‌బోర్న్ నుంచి దోహా వెళ్ళే విమానంలో ప్రయాణించగా, వారి పక్కనే కూర్చున్న ఓ మహిళ ప్రయాణం మధ్యలోనే మరణించారని వారు ఆస్ట్రేలియాలోని 'చానల్ 9'కు తెలిపారు.
ఆమె మరణించిన తర్వాత, విమాన సిబ్బంది ఆమె శరీరంపై ఒక దుప్పటి కప్పారని, విమానంలో ఖాళీ సీట్లు ఉన్నప్పటికీ వాటిలో కూర్చునేందుకు తమను అనుమతించలేదని మిషెల్ రింగ్ అన్నారు.
దాంతో, వారు నాలుగు గంటల పాటు ఆ మృతదేహం పక్కనే కూర్చొని ప్రయాణించాల్సి వచ్చిందని తెలిపారు.
వివరాలు
అసౌకర్యానికి క్షమాపణలు
ఈ ఘటనపై ఖతార్ ఎయిర్‌వేస్ స్పందిస్తూ, ఆ జంటకు కలిగిన అసౌకర్యానికి క్షమాపణలు తెలిపింది.
అంతేకాక, వారిని సంప్రదించేందుకు ప్రయత్నిస్తున్నామని వెల్లడించింది.
అయితే, తమను ఖతార్ ఎయిర్‌వేస్ లేదా టిక్కెట్లు బుక్ చేసిన ఖాంటాస్ ఏ సంస్థా సంప్రదించలేదని, ఎలాంటి మద్దతు అందించలేదని ఆ జంట ఆరోపించింది.
ఇలాంటి సంఘటనలు ఎదురైనప్పుడు, ప్రయాణికుల భద్రతను దృష్టిలో ఉంచుకుని ప్రత్యేక నియమాలు అవసరమని రింగ్, కోలిన్ అభిప్రాయపడ్డారు.
వివరాలు
ఖాళీ సీట్లు ఉన్నా, కూర్చోనివ్వలేదు
మహిళ అపస్మారక స్థితిలోకి వెళ్లగానే సిబ్బంది వెంటనే స్పందించారని, అయితే ఆమెను కాపాడలేకపోయారని రింగ్ 'చానల్ 9' కరెంట్ అఫైర్స్ కార్యక్రమంలో తెలిపారు.
ఆ దృశ్యం చూడటం హృదయ విదారకమని అన్నారు.
విమాన సిబ్బంది ఆ మృతదేహాన్ని బిజినెస్ క్లాస్ వైపు తీసుకెళ్లేందుకు ప్రయత్నించారని, కానీ "ఆమె శరీరం భారంగా ఉండడం వల్ల సీటులోంచి కదిలించలేకపోయారు" అని రింగ్ చెప్పారు.
విమానంలో ఖాళీ సీట్లు ఉన్న విషయాన్ని తాను సిబ్బందికి తెలియజేశానని,అయితే "మీరు పక్కనే ఉన్న సీట్లో కూర్చోవాలా?"అని అడిగారని, అప్పుడు తాను "నాకు ఎలాంటి ఇబ్బంది లేదు" అని సమాధానమిచ్చినట్లు చెప్పారు.
వివరాలు
నాలుగు గంటల తర్వాత ల్యాండింగ్
ఆ తరువాత, తాను పక్క సీటుకు మారగానే, తన సీట్లోనే ఆ మృతదేహాన్ని ఉంచారని వెల్లడించారు.
కోలిన్ మరో ఖాళీ సీటులో కూర్చున్నారని తెలిపారు. అయితే, ఖాళీ సీట్లు ఉన్నప్పటికీ, క్యాబిన్ క్రూ తనకు ఎలాంటి ప్రత్యామ్నాయ ఏర్పాట్లు చేయలేదని రింగ్ ఆవేదన వ్యక్తం చేశారు.
ఆమె మరణించిన నాలుగు గంటల తర్వాత విమానం ల్యాండ్ అయ్యింది.
కానీ వైద్య సిబ్బంది, పోలీసులు రాకముందు వరకు ప్రయాణికులందరూ విమానంలోనే ఉండాలని క్యాబిన్ సిబ్బంది సూచించారని వెల్లడించారు.
అంబులెన్స్ అధికారులు విమానంలోకి వచ్చాక, మహిళ ముఖంపై ఉంచిన దుప్పటిని తొలగించారని, అప్పుడు ఆమె ముఖం చూసినట్లు రింగ్ చెప్పారు.
ప్రయాణికులు, సిబ్బంది విధి నిర్వహణలో భద్రతకు ప్రాధాన్యం ఇవ్వాలని ఆ దంపతులు అభిప్రాయపడ్డారు.
వివరాలు
ఖతార్ ఎయిర్‌వేస్ ప్రకటన
"మీకు ఏమైనా సహాయం కావాలా? కౌన్సెలింగ్ అవసరమా?" అంటూ తమను ఎవరూ సంప్రదించలేదని కోలిన్ పేర్కొన్నారు.
"అది చాలా భయంకరమైన అనుభవం" అని ఆమె అన్నారు.
"ఆ మహిళ మరణానికి విమానయాన సంస్థ బాధ్యురాలు కాదని మాకు తెలుసు.
కానీ ఇలాంటి పరిస్థితుల్లో ప్రయాణికుల కోసం ఒక విధానాన్ని అమలు చేయాలి కదా" అని ఆమె అన్నారు.
"ఆ మహిళ కుటుంబం గురించి మేము ఆలోచిస్తున్నాం. ఆ దంపతులకు జరిగిన అసౌకర్యం, బాధకు చింతిస్తున్నాం. మా విధానాల ప్రకారం వారిని సంప్రదించేందుకు ప్రయత్నిస్తున్నాం" అని ఖతార్ ఎయిర్‌వేస్ ఒక ప్రకటనలో తెలిపింది.
"విమానంలో ఇలాంటి సంఘటనలు ఎదురైనప్పుడు, వాటిని నిర్వహించడం ఖతార్ ఎయిర్‌వేస్ బాధ్యత" అని ఖాంటాస్ అధికార ప్రతినిధి తెలిపారు.