Oman pilot: ఇజ్రాయెల్ విమానంలోకి ఒమన్ వ్యక్తి ఎలా వచ్చాడు?.. అసలు అనుమతి ఎవరిచ్చారు?
ఈ వార్తాకథనం ఏంటి
ఫ్లై దుబాయ్ FZ1073 విమానంలో బుధవారం చోటుచేసుకున్న ఘటనతో పెను ప్రమాదం తప్పింది. ప్రయాణికులు సురక్షితంగా బయటపడినా.. ఈ ఘటనకు సంబంధించి పలు కీలక ప్రశ్నలు ఇప్పుడు అధికారులను వెంటాడుతున్నాయి. దుబాయ్ నుంచి టెల్ అవీవ్ వెళ్తున్న ఈ విమానంలో కాక్‌పిట్‌లో ఇద్దరు పైలట్ల మధ్య ఘర్షణ జరిగింది. ఇజ్రాయెల్ అధికారులు, మీడియా కథనాల ప్రకారం ఒమన్‌కు చెందిన కో-పైలట్ భారతీయ పైలట్ స్మిత్ మచ్ఛర్‌పై కత్తితో దాడి చేసి, విమానాన్ని తన నియంత్రణలోకి తీసుకునే ప్రయత్నం చేశాడు. దీంతో విమానం ఒక్కసారిగా భారీగా కిందకు దిగింది. ప్రయాణికులు, సిబ్బంది జోక్యం చేసుకుని కో-పైలట్‌ను అదుపులోకి తీసుకోవడంతో పెను ప్రమాదం తప్పింది.
వివరాలు
ఒమన్ పైలట్‌కు అనుమతి ఎలా వచ్చింది?
అనంతరం విమానాన్నిసౌదీ అరేబియాలోని టబుక్‌లో అత్యవసరంగా ల్యాండ్ చేశాడు. ఈ విమానంలో మొత్తం 174మంది ప్రయాణికులు ఉన్నారని రాయిటర్స్ తెలిపింది.
ఈ ఘటనలో ప్రధానంగా వినిపిస్తున్న ప్రశ్న.. ఒమన్ పౌరుడైన వ్యక్తి ఇజ్రాయెల్ వెళ్లే విమానానికి కో-పైలట్‌గా ఎలా నియమితుడయ్యాడు?
కొన్ని ఇజ్రాయెల్ మీడియా కథనాల ప్రకారం,ఇజ్రాయెల్‌కు విమానాలు నడిపే పైలట్ల విషయంలో సంబంధిత దేశాలతో ఉన్న ఒప్పందాలు,భద్రతా నిబంధనలపై ఇప్పుడు పరిశీలన జరుగుతోంది.
ఇజ్రాయెల్ రవాణా మంత్రి మిరి రెగెవ్ కూడా దీనిపై దర్యాప్తు చేయాలని కోరినట్లు వార్తలు వచ్చాయి.
ఈ విషయంలో యూఏఈ విమానయాన నిబంధనలు, ఇజ్రాయెల్‌తో ఉన్న ఒప్పందాలు ఉల్లంఘించబడ్డాయా అనే అంశం కూడా పరిశీలనలో ఉంది.
అయితే ఈ ఆరోపణలపై పూర్తి అధికారిక స్పష్టత ఇంకా రాలేదు.
వివరాలు
కాక్‌పిట్‌లోకి కత్తి ఎలా వచ్చింది?
మరో కీలక ప్రశ్న కాక్‌పిట్‌లోకి కత్తి ఎలా వచ్చింది?
విమానాశ్రయాల్లో పదునైన వస్తువులపై కఠినమైన భద్రతా తనిఖీలు ఉంటాయి.
ఇజ్రాయెల్‌లో భద్రతా తనిఖీలు మరింత కఠినంగా ఉంటాయి. కాబట్టి ఆ వస్తువు కో-పైలట్ వెంట తీసుకువచ్చాడా, భద్రతా తనిఖీలను ఎలా దాటింది, లేక అది విమానంలోనే అందుబాటులో ఉన్న వస్తువా అనే విషయాలను అధికారులు తేల్చాల్సి ఉంది.
ఈ ఘటనను ఇజ్రాయెల్ అధికారులు అనుమానిత ఉగ్రదాడి కోణంలోనూ పరిశీలిస్తున్నారు.
ప్రధాని బెంజమిన్ నెతన్యాహు కో-పైలట్ విమానాన్ని కూల్చేందుకు ప్రయత్నించి ఉండొచ్చని చెప్పారు.
ఇరాన్ ప్రమేయం ఉందా,మరెవరైనా సహకరించారా అనే అంశాన్ని కూడా పరిశీలించాల్సి ఉందని ఆయన పేర్కొన్నారు.
అయితే ఇప్పటివరకు ఉద్దేశ్యం స్పష్టంగా తెలియదని ఫ్లై దుబాయ్ స్పష్టం చేసింది.
వివరాలు
ఫ్లై దుబాయ్ ఘటనపై దర్యాప్తు షురూ..
ముందస్తు ఊహాగానాలకు దూరంగా ఉండాలని సంస్థ కోరింది.
దర్యాప్తులో సౌదీ అరేబియా కీలక పాత్ర పోషిస్తోంది. విమానం అక్కడ ల్యాండ్ కావడంతో పాటు అనుమానిత కో-పైలట్ కూడా సౌదీ అధికారుల అదుపులో ఉన్నాడు.
యూఏఈ, ఇజ్రాయెల్ కూడా దర్యాప్తులో భాగస్వామ్యం కావాలని చూస్తున్నాయి.
ఈ ఘటన తర్వాత ఇజ్రాయెల్‌లోకి వచ్చే విదేశీ విమానాల పైలట్ల భద్రతా తనిఖీలను మరింత పెంచాలని నిర్ణయించినట్లు రాయిటర్స్ తెలిపింది.