Trump vs Harris: ట్రంప్ వర్సెస్ హారిస్ డిబేట్ పై ఉత్కంఠ .. ఇవిగో రూల్స్
ఈ వార్తాకథనం ఏంటి
అమెరికా అధ్యక్ష ఎన్నికలు సమీపిస్తున్న వేళ, డెమోక్రాట్‌, రిపబ్లికన్‌ అభ్యర్థులు తమ ప్రచారాన్ని ముమ్మరం చేస్తున్నారు. సర్వేలు ఉపాధ్యక్షురాలు కమలా హారిస్‌కు మద్దతు పెరుగుతోందని సూచిస్తుండగా, డొనాల్డ్ ట్రంప్ అధికార పక్షంపై తన విమర్శలను ఉధృతం చేస్తూ ప్రచారం కొనసాగిస్తున్నారు. ఈ పరిస్థితిలో, ట్రంప్,హారిస్‌ల మధ్య ప్రత్యక్ష చర్చకు (డిబేట్) రంగం సిద్ధమైంది. అధ్యక్ష పోరులో ఈ ఇద్దరి మధ్య మొదటిసారి జరుగుతున్న ఈ ముఖాముఖి సర్వత్రా ఆసక్తి రేపుతోంది.
వివరాలు
నేషనల్‌ కాన్‌స్టిట్యూషన్‌ సెంటర్‌లో చర్చ
ఈ చర్చను సెప్టెంబర్ 10న అమెరికా వార్తా సంస్థ ఏబీసీ న్యూస్‌ నిర్వహించనుంది. సెప్టెంబర్ 10 (అమెరికా కాలమానం ప్రకారం) రాత్రి 9.00 గంటలకు ఫిలడెల్ఫియాలోని నేషనల్‌ కాన్‌స్టిట్యూషన్‌ సెంటర్‌లో ఈ చర్చ జరగనుంది. ఈ డిబేట్‌కు ప్రేక్షకులను అనుమతించకపోయినప్పటికీ, ఏబీసీ న్యూస్‌ యాంకర్లు డేవిడ్‌ ముయిర్‌, లిన్సే డేవిస్‌లు సమన్వయకర్తలుగా వ్యవహరిస్తారు. చర్చ 90 నిమిషాల పాటు సాగనుంది, మధ్యలో రెండు స్వల్ప విరామాలు ఉంటాయి.
వివరాలు
సమన్వయకర్తలే ప్రశ్నలు అడుగుతారు
ఇది వరకు జరిగిన ట్రంప్-బైడెన్‌ చర్చలో మైకులు మ్యూట్‌ చేయడంపై వివాదం చెలరేగడంతో, ఈ చర్చకు కొన్ని నిబంధనలు సవరించబడ్డాయి. అభ్యర్థులలో ఒకరికి మాట్లాడే సమయం వచ్చినప్పుడు, ఇతర అభ్యర్థి మైక్‌ మ్యూట్‌ చేయబడుతుంది. కేవలం సమన్వయకర్తలే ప్రశ్నలు అడగనున్నారు.ప్రశ్నలు ఏవీ ముందస్తుగా ఎవరికీ తెలియవు. చర్చ జరుగుతున్నంతసేపు అభ్యర్థులు కేవలం పోడియం వెనకాలే నిలబడాలి. వారికి ఓ పెన్ను, పేపర్‌, నీరు అందుబాటులో ఉంటాయి. చివరలో అభ్యర్థులకు రెండుసార్లు రెండు నిమిషాల సమయం ఇవ్వబడుతుంది, తద్వారా వారు ముగింపు ప్రసంగం చేయగలరు.