ఉక్రెయిన్‌లో శాంతి స్థాపనకు భారత్ ప్రయత్నాన్ని స్వాగతిస్తాం: అమెరికా
ఈ వార్తాకథనం ఏంటి
ఉక్రెయిన్‌తో యుద్ధానికి దిగడం రష్యా వ్యూహాత్మక తప్పిదమని అమెరికా పేర్కొంది. ఉక్రెయిన్‌లో శాశ్వత శాంతిని నెలకొల్పేందుకు భారత్ ప్రయత్నిస్తే తాము తప్పకుండా స్వాగతిస్తామని ఆ దేశ విదేశాంగ శాఖ ప్రతినిధి మాథ్యూ మిల్లర్ పేర్కొన్నారు.
ఉక్రెయిన్‌తో యుద్ధం తర్వాత సైనిక సిబ్బంది, అపారమైన నష్టాన్ని రష్యా చవిచూసిందని చెప్పారు.
అమెరికా విధించిన ఆంక్షలు, ఎగుమతి నియంత్రణలతో రష్యా ఆర్థిక వ్యవస్థ కుంటుపడినట్లు కనిపిస్తోందని మాథ్యూ మిల్లర్ వెల్లడించారు.
ఉక్రెయిన్-రష్యా యుద్ధంలో ఉక్రెయిన్‌కు ప్రారంభం నుంచి అందుకున్న అంతర్జాతీయ మద్దతును తాము స్వాగతిస్తున్నట్లు స్పష్టం చేశారు.
అమెరికా
ఇతర దేశాల సార్వభౌమత్వాన్ని గౌరవించాలి: మోదీ-బైడెన్ సంయుక్త ప్రకటన
ఉక్రెయిన్ ప్రాదేశిక సమగ్రత, సార్వభౌమత్వాన్ని గుర్తించి, శాశ్వత శాంతిని సాధించేందుకు భారత్ మాత్రమే కాకుండా, ఇతర ఏ దేశమైనా ముందుపడితే తాము స్వాగతిస్తున్నామని మాథ్యూ మిల్లర్ చెప్పారు.
రష్యా- ఉక్రెయిన్ మధ్య శాంతి ఒప్పందాన్ని కుదర్చేందుకు భారత ప్రధాని మోదీ ముందుకొస్తారా? అన్న ప్రశ్నకు మాథ్యూ మిల్లర్ పై విధంగా స్పందించారు.
జూన్‌లో అమెరికా పర్యటన సందర్భంగా యూఎస్ అధ్యక్షుడు జో బైడన్‌ను కలిసినప్పుడు ప్రధాన మంత్రి నరేంద్ర మోదీ ఉక్రెయిన్ విషయంలో ఆందోళన వ్యక్తం చేశారు.
అంతర్జాతీయ చట్టం, ప్రాదేశిక సమగ్రత, సార్వభౌమాధికారాన్ని గౌరవించాలని ఇరువురు దేశాధినేతలు పిలుపునిచ్చారు.