వెజ్ వెరైటీలు, గ్రామీ విజేత వయోలిన్; ప్రధాని మోదీ కోసం వైట్‌హౌస్‌లో ప్రత్యేక ఏర్పాట్లు
ఈ వార్తాకథనం ఏంటి
ప్రధాని నరేంద్ర మోదీ మంగళవారం అమెరికా పర్యటనకు బయలుదేరారు.
ఈ నెల 22న మోదీ కోసం వైట్‌హౌస్‌లో అమెరికా అధ్యక్షుడు జో బైడెన్ అధికారిక డిన్నర్‌ను ఏర్పాటు చేశారు. ఈ క్రమంలో మోదీ కోసం వైట్‌హౌస్‌లో ప్రత్యేక ఏర్పాట్లు చేస్తున్నారు.
మోదీకి ఘనంగా స్వాగతం పలికేందుకు వైట్‌హౌస్‌లో సన్నాహాలు జరుగుతున్నాయి.
మోదీకి ఇష్టమైన వంటలను వండేందుకు ప్రత్యేక చెఫ్‌ను నియమించారు. సంగీత కళాకారులతో వినోద కార్యక్రమాన్ని ఏర్పాటు చేస్తున్నారు.
క్యాటరింగ్, అతిథుల ఆహార మెనూ, వినోదం వంటి వాటిపై వైట్‌హౌస్ ప్రత్యేక శ్రద్ధ తీసుకుంటున్న తెలుస్తోంది.
ఈ క్రమంలో వైట్‌హౌస్‌లో మోదీ కోసం చేస్తున్న ఏర్పాట్లను జో బైడెన్ భార్య జిల్ బైడెన్ పర్యవేక్షిస్తున్నారు.
అమెరికా
గ్రామీ అవార్డు గెలుచుకున్న అమెరికన్ వయోలినిస్టు బెల్‌తో ప్రత్యేక కచేరి
ప్రధాని మోదీ శాఖాహారి. ఈ క్రమలో ప్రధాని మోదీ ఇష్టమైన వెజ్ వంటకాలను రుచికరంగా వండేందుకు కాలిఫోర్నియాలోని శాక్రమెంటోకు చెందిన నినా కర్టిస్ అనే ప్రముఖ వెజ్ చెఫ్‌ను నియమించారు. ఈ విషయాన్ని జిల్ బైడెన్ కార్యాలయం కూడా దృవీకరించింది.
మోదీకి అవసరమైన మెనూను వైట్ హౌస్ ఎగ్జిక్యూటివ్ చెఫ్ క్రిస్‌కామర్‌ఫోర్డ్, వైట్ హౌస్ ఎగ్జిక్యూటివ్ పేస్ట్రీ చెఫ్ సూసీ మోరిసన్‌లతో కర్టిస్ కలిసి సిద్ధం చేయనున్నారు.
ఇదిలా ఉంటే, గ్రామీ అవార్డు గెలుచుకున్న అమెరికన్ వయోలిన్, కండక్టర్ జాషువా బెల్‌తో ప్రత్యేక కార్యక్రమాన్ని ఏర్పాటు చేసినట్లు జిల్ బైడెన్ కార్యాలయం పేర్కొంది.
రెండు వందల సంవత్సరాలుగా వైట్‌హౌస్‌లో ప్రదర్శనలు ఇస్తున్న మెరైన్ బ్యాండ్ షోను కూడా మోదీ కోసం ఏర్పాటు చేశారు.