Canada:కెనడా ఎన్నికల్లో లిబరల్స్ విజయం - భారత్, కెనడా మధ్య విభేదాలు తొలగనున్నాయా!
ఈ వార్తాకథనం ఏంటి
కెనడా సాధారణ ఎన్నికల్లో లిబరల్ పార్టీ ఘన విజయాన్ని సాధించింది. ఈ విజయంలో భాగంగా మార్క్ కార్నీ మరోసారి ప్రధానిగా బాధ్యతలు స్వీకరించడానికి సన్నద్ధమవుతున్నారు.
ఈ సందర్భంగా భారత ప్రధాని నరేంద్ర మోదీ ఆయనకు హార్దిక శుభాకాంక్షలు తెలియజేశారు.
ఇరు దేశాలు ఎంతోకాలంగా ప్రజాస్వామ్య విలువలు, చట్టపరమైన పరిపాలన విషయంలో గాఢమైన నమ్మకంతో ముందుకు సాగుతున్నాయని మోదీ వ్యాఖ్యానించారు.
కెనడాతో ఉన్న భాగస్వామ్యాన్ని మరింత బలోపేతం చేసుకోవాలని, రెండు దేశాల ప్రజలకు మెరుగైన అవకాశాలు అందించడానికి కలిసి పనిచేయాలని భారత ప్రభుత్వం ఆసక్తిగా ఎదురుచూస్తోందని చెప్పారు.
వివరాలు
భారత్‌కు వ్యతిరేకంగా ట్రూడో..
ఇటీవల అమెరికా అధ్యక్షుడు ట్రంప్ పలు దేశాలపై, ముఖ్యంగా కెనడాపై విధించిన టారిఫ్‌లు ఆ దేశానికి ఆర్థికంగా కష్టాలు తెచ్చాయి.
ఈ పరిణామాల నేపథ్యంలో కెనడాలో రాజకీయ ఉత్కంఠ పెరిగింది. ప్రధానిగా ఉన్న జస్టిన్ ట్రూడో తన సొంత పార్టీ నుంచే తీవ్రమైన వ్యతిరేకతకు లోనయ్యారు.
దీనివల్ల ఆయన తన పదవికి తోడు పార్టీ నాయకత్వానికి కూడా రాజీనామా చేశారు.
ఆ స్థానంలో మార్క్ కార్నీ ప్రధానిగా నియమితులయ్యారు. ట్రూడో భారత్‌కు వ్యతిరేకంగా వ్యవహరించినప్పటికీ, కార్నీ అధికారంలోకి వచ్చిన తర్వాత భారతదేశానికి అనుకూలంగా వ్యవహరిస్తూ వస్తున్నారు.
దీంతో ఇరు దేశాల మధ్య గతంలో ఏర్పడిన చీలికల పరంపర ముగిసి, సంబంధాలు పునరుజ్జీవనం పొందే అవకాశం కనిపిస్తోంది.
వివరాలు
భారత్, కెనడాలు కలిసి భాగస్వామ్య వ్యూహాన్ని నిర్మించగలవు
భారత్‌తో మళ్లీ సుస్థిర సంబంధాలను నెలకొల్పేందుకు కృషి చేస్తామని కార్నీ బహిరంగంగా చెప్పారు.
భారతదేశం, కెనడా మధ్య ఉన్న ద్వైపాక్షిక సంబంధాలను పునరుద్ధరించేందుకు తాము ప్రయత్నిస్తున్నామని స్పష్టంచేశారు.
భారతదేశంతో వ్యక్తిగతంగా, ఆర్థికంగా, వ్యూహాత్మకంగా కెనడియన్లు అనుబంధం కలిగి ఉన్నారని చెప్పారు.
ప్రస్తుతం ప్రపంచ ఆర్థిక వ్యవస్థ పునర్నిర్మాణ దశలో ఉన్న సమయంలో, భారత్, కెనడాలు కలిసి భాగస్వామ్య వ్యూహాన్ని నిర్మించగలవని తన నమ్మకాన్ని వ్యక్తం చేశారు.
తాము అధికారంలోకి వచ్చాక న్యూఢిల్లీతో పాటు ఇతర సారూప్యత దేశాలతో కూడ వాణిజ్య సంబంధాలను బలోపేతం చేయడానికి తగిన చర్యలు తీసుకుంటామని తెలిపారు.
అధికారికంగా కూడా భారత్-కెనడా మధ్య ద్వైపాక్షిక సంబంధాలను మెరుగుపరచడానికి కృషి చేస్తామని చెప్పారు.
వివరాలు
భారత్‌తో విభేదాలకు కేంద్రబిందువైన ట్రూడో వ్యవహారం
దీని ప్రభావంగా, ఇరు దేశాల మధ్య వాణిజ్య మరియు దౌత్య సంబంధాలు మరింత పటిష్టంగా మారే అవకాశం ఉంది.
అంతేకాకుండా, కెనడాలో విద్యాభ్యాసాన్ని ఆశించే భారత విద్యార్థులకు ఇది ఎంతో అనుకూలంగా మారనుంది.
భారత్, కెనడా మధ్య మిత్రబంధం దశాబ్దాలుగా కొనసాగుతున్నప్పటికీ, 2013 నుంచి ఇరుదేశాల సంబంధాలు క్షీణించడం ప్రారంభమైంది.
ట్రూడో ప్రధానిగా ఉన్న సమయంలో, ఖలిస్థానీ ఉగ్రవాది హర్‌దీప్ సింగ్ నిజ్జర్ హత్యకు భారత్ హస్తం ఉందంటూ చేసిన ఆరోపణలతో సంబంధాలు మరింత ఉద్రిక్తతకు లోనయ్యాయి.
ఆధారాలేమీ చూపకుండా భారత నిఘా సంస్థలపై నేరస్థంగా ముద్ర వేసిన కెనడా ప్రభుత్వ తీరును భారత్ ఖండించింది.
ఈ పరిణామాల నేపథ్యంలో ఇరు దేశాలు తమ తమ దౌత్యవేత్తలను వెనక్కు పిలిపించుకున్నాయి.
వివరాలు
కెనడియన్ ఇంటెలిజెన్స్‌ డిప్యూటీ డైరెక్టర్ సంచలన వ్యాఖ్యలు
అంతేగాక, భారత్ కెనడా ఎన్నికల ప్రక్రియలో జోక్యం చేసుకునే యత్నం చేస్తోందంటూ కెనడియన్ ఇంటెలిజెన్స్‌ డిప్యూటీ డైరెక్టర్ సంచలన వ్యాఖ్యలు చేయడం ద్వారా దేశాల మధ్య దూరం మరింత పెరిగింది.
ఇదంతా ట్రూడో పాలనలో చోటుచేసుకున్న ఘటనలే. ఇప్పుడు, కార్నీ అధికారంలోకి వచ్చిన నేపథ్యంలో, ఈ విభేదాలను పరిష్కరించి, పునఃసఖ్యత సాధించడానికి మార్గాలు తలపోసే అవకాశం స్పష్టంగా కనిపిస్తోంది.