Jetour T2 Hybrid SUV: భారత్‌లోకి Jetour T2 హైబ్రిడ్ కారు? వైరల్ వీడియో వెనుక నిజమిదే!
ఈ వార్తాకథనం ఏంటి
భారత రోడ్లపై ట్రాన్స్‌పోర్ట్ ట్రక్కుల్లో వెళ్తున్న Jetour T2 హైబ్రిడ్ ఎస్‌యూవీల వీడియో ఇప్పుడు ఆటో మొబైల్ ప్రియుల దృష్టిని ఆకర్షిస్తోంది. ఒకేసారి పలు కార్లు కనిపించడంతో ఇవి భారత డీలర్‌షిప్‌లకు చేరుకుంటున్నాయనే ప్రచారం మొదలైంది. అయితే, ఈ వాహనాలు భారత్‌కు కాకుండా భూటాన్‌కు వెళ్తున్నట్లు వీడియోను షేర్ చేసిన యూట్యూబర్ వెల్లడించారు. కోల్‌కతా నుంచి భూటాన్‌కు వీటిని తరలిస్తున్నట్లు సమాచారం.
Details
JSW ఆధ్వర్యంలో భారత్‌లోకి ఎంట్రీ
అయితే, Jetour T2 భారత మార్కెట్‌లోకి రావడం మాత్రం నిజమే. JSW గ్రూప్ ఈ ఎస్‌యూవీని దేశంలో విక్రయించేందుకు సిద్ధమవుతోంది.
ఇప్పటికే టీజర్ చిత్రాలు విడుదలయ్యాయి. ఈ కారు పలుమార్లు భారత రోడ్లపై పరీక్షల సమయంలోనూ కనిపించింది.
అంతర్జాతీయ మార్కెట్లలో బాక్సీ డిజైన్, ఆఫ్‌రోడ్ తరహా రూపం, ఆధునిక ఫీచర్లతో Jetour T2 ప్రత్యేక గుర్తింపు తెచ్చుకుంది.
Details
ఫార్చ్యూనర్‌కు పోటీ ఇచ్చే అవకాశం
భారత్‌లో విడుదలైన తర్వాత టయోటా ఫార్చ్యూనర్ వంటి ఫుల్‌సైజ్ ఎస్‌యూవీలకు Jetour T2 పోటీ ఇవ్వనుంది.
దీని ధర రూ.35 లక్షల నుంచి రూ.40 లక్షల మధ్య ఉండవచ్చని అంచనా. ఈ ధరలో వస్తే ప్రీమియం ఎస్‌యూవీ విభాగంలో కొత్త పోటీ మొదలయ్యే అవకాశం ఉంది.
Details
హైబ్రిడ్ ఇంజిన్‌లో పవర్ ఎంత?
ప్రపంచ మార్కెట్లలో Jetour T2 ప్లగ్‌-ఇన్ హైబ్రిడ్ (PHEV), పూర్తిస్థాయి ఎలక్ట్రిక్ (EV) రూపాల్లో అందుబాటులో ఉంది.
భారత్‌కు వచ్చే మోడల్‌లో హైబ్రిడ్ సెటప్ మాత్రమే ఉండవచ్చని సమాచారం. అంతర్జాతీయ PHEV వెర్షన్‌లో 1.5 లీటర్ టర్బో పెట్రోల్ ఇంజిన్ 154 హెచ్‌పీ పవర్, 220 ఎన్ఎం టార్క్ ఉత్పత్తి చేస్తుంది.
దీనికి 26.7 kWh బ్యాటరీ జతచేశారు. సింగిల్ మోటార్ ఫ్రంట్ వీల్ డ్రైవ్, డ్యూయల్ మోటార్ ఆల్ వీల్ డ్రైవ్ ఆప్షన్లు ఉన్నాయి.
బ్యాటరీతో ఒక్కసారి ఛార్జ్ చేస్తే NEDC ప్రమాణాల ప్రకారం 139 కిలోమీటర్ల వరకు ప్రయాణించవచ్చని కంపెనీ పేర్కొంటోంది.
Details
భూటాన్‌కు ఎందుకు వెళ్తున్నాయి?
భూటాన్‌లో ఎలక్ట్రిక్, కొత్త ఎనర్జీ వాహనాలకు ఆదరణ పెరుగుతోంది. తూర్పు భారతదేశానికి సమీపంలో ఉండటంతో పశ్చిమ బెంగాల్ మీదుగా అక్కడికి కార్ల రవాణా సాధారణమే.
అందుకే ఈ వీడియోలో కనిపించిన కార్లను భారత లాంచ్‌తో ముడిపెట్టడం తొందరపాటే. భారత్‌లో Jetour T2 అధికారిక విడుదల, ధర, పూర్తి ఫీచర్లపై స్పష్టత రావాల్సి ఉంది.