Tesla: డ్రైవర్‌లెస్ రోబోవాన్‌ను పరిచయం చేసిన టెస్లా.. దాని ప్రత్యేకత ఏంటంటే..?
టెస్లా సీఈవీ ఎలాన్ మస్క్ తన సృజనాత్మకతతో మరోసారి ప్రపంచాన్ని ఆశ్చర్యపర్చారు. ఆ సంస్థ రూపొందించిన రోబో వ్యాన్‌ను 'వీరోబో' కార్యక్రమంలో హఠాత్తుగా ప్రదర్శించారు. ఈ కార్యక్రమం కాలిఫోర్నియాలోని వార్నర్ బ్రదర్స్ ప్రాంగణంలో నిర్వహించబడింది. రోబో వ్యాన్ సాధారణ డిజైన్లకు పూర్తి భిన్నంగా ఉంది; ఇది రైలు ఇంజిన్ వంటి డిజైన్‌లో తయారుచేయబడింది. దీని చక్రాలు బయటకు కనిపించకపోవడం ప్రత్యేకత. దీన్ని 20 మంది ప్రయాణికులను లేదా సరకులను తరలించడానికి ఉపయోగించవచ్చని సంస్థ పేర్కొంది. ఈ వ్యాన్ మైలు దూరం ప్రయాణించడానికి 5 నుండి 10 సెంట్ల వరకు ఖర్చవుతుందని టెస్లా బృందం తెలిపింది. దీనిని అటానమస్ సెల్ఫ్ డ్రైవింగ్ కోసం నిర్మించినట్లు తెలుస్తోంది.తద్వారా టెస్లా మాస్ ట్రావెల్ సెగ్మెంట్లోకి కూడా ప్రవేశించినట్లైంది.
10 రెట్లు అదనంగా వాడుకునే సైబర్ ట్యాక్సీ
ఇప్పటివరకు సంస్థ వాహనాల లైనప్ కేవలం చిన్న వాహనాలకు మాత్రమే పరిమితమైంది. మస్క్ రోబో ట్యాక్సీని కూడా ఆవిష్కరించారు. రెండు డోర్లతో ఉన్న ఈ కారుకు స్టీరింగ్ వీల్ లేదా పెడల్స్ లేవు. దీనిని మస్క్ సైబర్ క్యాబ్ అని ప్రేక్షకులకు పరిచయం చేశారు. దీని తయారీ 2026 నుండి మొదలవుతుందని వెల్లడించారు. వినియోగదారులు దీనిని 30,000 డాలర్ల కంటే తక్కువ ధరకు కొనుగోలు చేయవచ్చని తెలిపారు. ప్రతీ మైలు ప్రయాణానికి 20 సెంట్లు ఖర్చవుతుందని పేర్కొన్నారు. అటానమస్ కార్లను సాధారణ వాహనాల కంటే 5 నుండి 10 రెట్లు ఎక్కువగా వాడుకోవచ్చు అని మస్క్ వెల్లడించారు.
