Apple: అమెరికా కోసం ఐఫోన్ 17 సిరీస్‌ను భారత్‌లో తయారు చేయనున్న ఆపిల్
ఈ వార్తాకథనం ఏంటి
టెక్నాలజీ రంగంలో అగ్రగామి సంస్థ ఆపిల్ తన తయారీ వ్యూహంలో విప్లవాత్మక అడుగు వేసింది. అమెరికా మార్కెట్‌ను దృష్టిలో ఉంచుకొని, రాబోయే ఐఫోన్ 17 సిరీస్ మొత్తం ఉత్పత్తిని పూర్తిగా భారతదేశంలోనే జరపాలని కంపెనీ అధికారికంగా ప్రకటించింది. ఇంతవరకు కేవలం కొద్ది మోడళ్లను మాత్రమే భారత్‌లో అసెంబుల్ చేసిన ఆపిల్, తొలిసారిగా ప్రో మోడళ్లతో సహా మొత్తం సిరీస్‌ను ఇక్కడే తయారు చేయాలని నిర్ణయించడం ప్రత్యేక ప్రాధాన్యం సంతరించుకుంది. ఈ చర్య ద్వారా చైనాపై ఆధారపడే పరిస్థితిని గణనీయంగా తగ్గించుకోవాలన్నది ఆపిల్ ప్రధాన లక్ష్యం.
వివరాలు
టాటా, ఫాక్స్‌కాన్ ప్లాంట్లలో భారీగా ఉత్పత్తి పెంపు
ఈ వ్యూహాత్మక మార్పులో భారతదేశానికి చెందిన టాటా గ్రూప్ తో పాటు తైవాన్‌కు చెందిన ఫాక్స్‌కాన్ టెక్నాలజీ గ్రూప్ కీలక పాత్ర పోషించనున్నాయి. బ్లూమ్‌బెర్గ్ వెల్లడించిన సమాచారం ప్రకారం,రాబోయే రెండేళ్లలో ప్రపంచవ్యాప్తంగా ఉత్పత్తి కానున్న ఐఫోన్‌లలో సగం వాటా భారతదేశంలో తయారు అవుతుందని అంచనా. దీని కోసం తమిళనాడులోని హోసూర్ టాటా ప్లాంట్తో పాటు, బెంగళూరు విమానాశ్రయానికి సమీపంలో ఉన్న ఫాక్స్‌కాన్ ఉత్పత్తి కేంద్రాన్ని విస్తృతంగా అభివృద్ధి చేయనున్నారు. ఈ సరికొత్త సిరీస్‌ను 2025 సెప్టెంబర్‌లో గ్లోబల్ మార్కెట్‌లో విడుదల చేయాలని ప్రణాళిక రూపొందించారు. భారతదేశంలో ఉత్పత్తిని పెంచాలన్న ఆపిల్ నిర్ణయం ఇప్పటికే అద్భుత ఫలితాలను ఇస్తోంది.
వివరాలు
ఐఫోన్‌ల విలువ 7.5 బిలియన్ అమెరికన్ డాలర్లు
ఈ ఆర్థిక సంవత్సరం ఏప్రిల్‌ నుంచి కేవలం నాలుగు నెలల్లోనే భారతదేశం నుంచి ఎగుమతి అయిన ఐఫోన్‌ల విలువ 7.5 బిలియన్ అమెరికన్ డాలర్లకు చేరింది. ఇది గత ఆర్థిక సంవత్సరంలో మొత్తం ఎగుమతుల విలువగా నమోదైన 17 బిలియన్ డాలర్లలో దాదాపు సగానికి సమానం కావడం విశేషం. ఈ నిర్ణయం వల్ల టారిఫ్‌ల రూపంలో సుమారు 1.1 బిలియన్ డాలర్ల అదనపు భారం పడవచ్చని ఆపిల్ అంచనా వేస్తున్నప్పటికీ, సరఫరా గొలుసును విభిన్నతరం చేయడం అత్యంత కీలకమని సంస్థ భావిస్తోంది. ఈ వ్యూహంతో భారత్‌లో ఆపిల్ తయారీ సామర్థ్యం మరింత పెరగడమే కాకుండా, భారతదేశం ప్రపంచ ఎలక్ట్రానిక్స్ తయారీ కేంద్రంగా మరింత గుర్తింపు పొందనుందని విశ్లేషకులు అంచనా వేస్తున్నారు.