Trump Tariffs War: అమెరికా, చైనా మధ్య తీవ్రమైన వాణిజ్య యుద్దం.. ఎలక్ట్రానిక్స్ విడి భాగాలపై భారత్ కంపెనీలకు రాయితీ
ఈ వార్తాకథనం ఏంటి
అమెరికా అధ్యక్షుడు డొనాల్డ్ ట్రంప్ చైనాపై దాడులు కొనసాగిస్తూ, సుంకాలను వరుసగా పెంచుతున్నారు. దీని ప్రభావంగా చైనా కంపెనీలకు అమెరికా నుంచి వచ్చే ఆర్డర్లు గణనీయంగా తగ్గిపోతున్నాయి. ఈ పరిస్థితిలో, చైనాలోని ఎలక్ట్రానిక్స్ విడిభాగాల తయారీ సంస్థలు భారతీయ కంపెనీలకు తగ్గింపు ధరలపై భాగస్వామ్యం చేయడానికి సిద్ధమవుతున్నాయి. ప్రస్తుతం ఇవి 5 శాతం వరకు డిస్కౌంట్‌ను ఆఫర్ చేస్తున్నాయి.
వివరాలు
భారత ఎలక్ట్రానిక్స్ ఉత్పత్తిదారులకు లాభాల వృద్ధి అవకాశాలు
టీవీలు, ఫ్రిజ్‌లు, స్మార్ట్‌ఫోన్ల తయారీదారుల ప్రకారం, ఈ రాయితీల వల్ల భారత కంపెనీలు తమ లాభాల్లో 2 నుండి 3 శాతం వరకు పెరుగుదల సాధించే అవకాశముంది. కంపెనీలు ఈ లాభాన్ని వినియోగదారులకు మళ్లించేందుకు అమ్మకాలను పెంచేందుకు యత్నిస్తున్నాయి.
వివరాలు
చైనాపై అధికంగా ఆధారపడుతున్న భారతీయ ఎలక్ట్రానిక్స్ పరిశ్రమ
ప్రస్తుతం భారత కంపెనీలు వినియోగించే ఎలక్ట్రానిక్స్ విడిభాగాల్లో దాదాపు 75 శాతం చైనాలో నుంచే దిగుమతులు వస్తున్నాయి. గోద్రెజ్ అప్లయన్స్ విభాగానికి చీఫ్ కమల్ నంది ప్రకారం, చైనా సంస్థలు ఆర్డర్ల లోపంతో ఒత్తిడిలో ఉన్నాయి. దీనివల్ల భారతీయ సంస్థలతో ధరలపై చర్చలు జరిపే అవకాశం ఉందని ఆయన అభిప్రాయపడ్డారు.
వివరాలు
ముడి సరుకుల నిల్వలు,కొత్త ఆర్డర్ల తాలూకు గణాంకాలు
సాధారణంగా ఎలక్ట్రానిక్స్ రంగంలో రెండు లేదా మూడు నెలల అవసరాన్ని తీర్చే స్థాయిలో ముడి సరుకులు నిల్వలో ఉంచుతారు. మే-జూన్ నెలల నుంచి సంస్థలు తాజా ఆర్డర్లను ఇవ్వడం ప్రారంభిస్తాయి. గ్లోబల్ ట్రేడ్ రిసెర్చ్ ఇనీషియేటివ్ వెల్లడించిన నివేదిక ప్రకారం, 2024 ఆర్థిక సంవత్సరంలో భారత్‌కి ఎలక్ట్రానిక్స్ విడిభాగాల దిగుమతులు 36.7 శాతం పెరిగి 34.4 బిలియన్ డాలర్లకు చేరాయి. 2019లో ఇది 15.8 బిలియన్ డాలర్లుగా ఉండగా, ఐదేళ్లలో 118.2 శాతం వృద్ధిని నమోదు చేసింది.
వివరాలు
చైనా కంపెనీల వద్ద మిగులు నిల్వలు.. ధరల తగ్గుదల చర్చలు
చైనా సంస్థలు ముడి సరుకుల మిగులు సమస్యలను ఎదుర్కొంటున్నాయని టీవీ కాంట్రాక్ట్ తయారీదారు సూపర్ ప్లాస్ట్రానిక్స్ సీఈఓ అవనీత్ సింగ్ మార్వా తెలిపారు. ఆయన ప్రకారం, అమెరికా ఎగుమతులు నిలిచిపోవడంతో, చైనా సంస్థలు భారత కంపెనీలతో 5 శాతం వరకు ధర తగ్గించేందుకు చర్చలు జరుపుతున్నాయి. అయితే దేశీయంగా డిమాండ్ తక్కువగా ఉండటం వల్ల, ఈ రాయితీల ప్రయోజనాలను వినియోగదారులకు మళ్లించేందుకు కంపెనీలు ధరలు తగ్గించే అవకాశముందని ఆయన అన్నారు. 2024లో చైనా నుంచి అమెరికాకు దిగుమతుల్లో ఎలక్ట్రికల్, ఎలక్ట్రానిక్ పరికరాలే ప్రధానంగా ఉన్నాయని సమాచారం. అయితే ఈ విభాగంలో డిమాండ్ తగ్గడం వల్ల చైనా తయారీదారులు నష్టాలు ఎదుర్కొంటున్నారు.
వివరాలు
భారత ప్రభుత్వ ప్రోత్సాహంతో దేశీయ తయారీకి ఊతం
దేశీయంగా ప్రభుత్వం నుండి ప్రోత్సాహాలు, నాణ్యత ప్రమాణాలపై కఠిన నిబంధనలు, సుంకాల విధానం తదితర కారణాలతో చైనా పరికరాల డిమాండ్ తగ్గింది. ఈ పరిస్థితి స్థానిక తయారీని ప్రోత్సహించడంలో కీలకంగా మారింది. ఇటీవలే ప్రభుత్వం ప్రకటించిన ఎలక్ట్రానిక్స్ కాంపోనెంట్ మాన్యుఫ్యాక్చరింగ్ స్కీమ్ ప్రకారం, 2030 నాటికి ఈ రంగం 145-155 బిలియన్ డాలర్ల స్థాయికి చేరుకునే అవకాశముందని అంచనా. ప్రస్తుతం భారత్ దిగుమతి చేసుకునే ముఖ్య ఎలక్ట్రానిక్ భాగాలు.. చిప్‌లు, కంప్రెసర్‌లు, ఇన్నర్ గ్రూవ్డ్ కాపర్ ట్యూబ్‌లు, ఓపెన్ సెల్ టీవీ ప్యానెల్‌లు, ప్రింటెడ్ సర్క్యూట్ బోర్డ్‌లు, బ్యాటరీ సెల్‌లు, డిస్‌ప్లే మాడ్యూల్‌లు, కెమెరా మాడ్యూల్‌లు, ఫ్లెక్సిబుల్ పిసీబీ లాంటి అనేక భాగాలు ఇందులో ఉంటాయి.
వివరాలు
భవిష్యత్ ఆశలు - దిగుమతులపై ప్రభావం
అమెరికా మార్కెట్‌లో మందగమనం, డిమాండ్ తగ్గడముతో విడిభాగాల ధరలు కూడా తక్కువవుతాయని డైక్సన్ టెక్నాలజీస్ ఎండీ అతుల్ లాల్ అభిప్రాయపడ్డారు.