Devara:హాలీవుడ్ ఈవెంట్ లో'దేవర'..ఖుష్‌ అవుతోన్న ఫ్యాన్స్‌
జూనియర్ ఎన్టీఆర్ హీరోగా కొరటాల శివ దర్శకత్వంలో రూపొందిస్తున్న చిత్రం 'దేవర'. ఈ సినిమా సెప్టెంబర్ 27న ప్రపంచవ్యాప్తంగా ప్రేక్షకుల ముందుకు రానుంది. ఇప్పటికే ఈ సినిమాపై భారీ అంచనాలు ఉన్నాయి. తాజాగా దీనికి సంబంధించిన ఓ వార్త అభిమానుల్లో జోష్‌ నింపుతోంది'దేవర'ను హాలీవుడ్‌లో జరగనున్న ఈవెంట్‌లో ప్రదర్శించనున్నారు. కాలిఫోర్నియాలోని లాస్ ఏంజెలెస్‌లో జరుగనున్న'బియాండ్ ఫెస్ట్'అనే అతిపెద్ద జానర్ ఫిల్మ్ ఫెస్టివల్‌లో ఈ సినిమా ప్రదర్శించబడుతుంది. సెప్టెంబర్ 25 నుంచి అక్టోబర్ 9 వరకు ఈ ఈవెంట్ జరుగుతుంది. సెప్టెంబర్ 26 సాయంత్రం ఈజిప్టియన్ థియేటర్‌లో హాలీవుడ్ ప్రేక్షకులు,ప్రముఖులు ఈ సినిమాను వీక్షించనున్నారు. ఈ సందర్బంగా ఎన్టీఆర్ సెప్టెంబర్ 25న అమెరికా వెళ్లనున్నారని సినీవర్గాలు తెలిపాయి.ఈ వార్తతో అభిమానులు మరింత ఉత్సాహంగా ఉన్నారు.
టికెట్ల ప్రీసేల్ ద్వారానే వన్ మిలియన్ డాలర్ల మార్క్‌
'దేవర' ట్రైలర్ విడుదల ఈవెంట్‌లో ఎన్టీఆర్ సినిమాపై అంచనాలను మరింత పెంచారు. ఆయన మాట్లాడుతూ, 'దేవర' విజువల్స్ అద్భుతంగా ఉంటాయని, చివరి 40 నిమిషాలు సినిమా ప్రత్యేకమైన అనుభవాన్ని కలిగిస్తాయని పేర్కొన్నారు. ఈ సినిమా ద్వారా జాన్వీ కపూర్ టాలీవుడ్‌లోకి వస్తున్నారు.సైఫ్ అలీఖాన్ కీలకపాత్రలో కనిపించనున్నారు. యాక్షన్ డ్రామాగా రూపొందుతున్న ఈ సినిమా ప్రీసేల్ బుకింగ్స్‌లో పలు రికార్డులు సృష్టించింది. నార్త్ అమెరికన్ బాక్సాఫీస్‌లో అత్యంత వేగంగా టికెట్ల ప్రీసేల్ ద్వారానే వన్ మిలియన్ డాలర్ల మార్క్‌ను చేరిన సినిమాగా 'దేవర' నిలిచింది. ట్రైలర్ విడుదల కాకముందే ఈ ఘనత సాధించిన తొలి భారతీయ చిత్రంగా 'దేవర' రికార్డు నెలకొల్పింది. ఇటీవల విడుదలైన ట్రైలర్ కూడా మంచి ప్రేక్షకాదరణను పొందింది.
