Dhanush Political Entry: నాబలం బలగం అన్నీ ప్రేక్షకులే...నా వెనుక ఏ రాజకీయ పార్టీలేదు
ఈ వార్తాకథనం ఏంటి
తమిళ స్టార్‌ హీరో ధనుష్ రాజకీయాల్లోకి వస్తారనే ప్రచారానికి ఎట్టకేలకు క్లారిటీ ఇచ్చారు. తన వెనుక ఏ రాజకీయ పార్టీ లేదని, దేవుడు, అభిమానులు, ప్రజలు మాత్రమే తనకు అండగా ఉన్నారని స్పష్టం చేశారు. చెన్నైలో జరిగిన 'ఓమ్‌' ఆడియో విడుదల కార్యక్రమంలో మాట్లాడిన ఆయన.. తనను ఎవరో నడిపిస్తున్నారనే ప్రచారాన్ని కొట్టిపారేశారు. గత కొంతకాలంగా ధనుష్ రాజకీయాల్లోకి వస్తారని, ముఖ్యంగా బీజేపీ ఆయనకు మద్దతుగా ఉందనే వార్తలు వినిపిస్తున్నాయి. అభిమాన సంఘాలను సంక్షేమ సంస్థలుగా మార్చడం, సభ్యత్వాన్ని పెంచడం వంటి పరిణామాలు ఈ ప్రచారానికి మరింత ఊతమిచ్చాయి. అయితే ఇప్పుడు ధనుష్ చేసిన వ్యాఖ్యలతో ఈ ఊహాగానాలకు తెరపడినట్లైంది.
Details
నా వెనుక ఎవరూ లేరు.. అభిమానులే బలం
''నా గురించి ఎన్నో పుకార్లు ప్రచారంలో ఉన్నాయి. నా వెనుక కొందరు వ్యక్తులు ఉన్నారని, మరికొందరు నాకు అండగా నిలుస్తున్నారని చెబుతున్నారు.
కానీ నిజం వేరు. దేవుడు నన్ను నడిపిస్తున్నాడు. నా అభిమానులు నా వెన్నంటే ఉన్నారు. ప్రజలు నా పక్షాన నిలుస్తున్నారు. ఇంతకు మించి నా వెనుక ఎవరూ లేరు'' అని ధనుష్ స్పష్టం చేశారు.
తన రాజకీయ భవిష్యత్తుపై నేరుగా ప్రకటన చేయకపోయినా.. ప్రస్తుతం తనకు ఏ పార్టీతోనూ సంబంధం లేదనే విషయాన్ని మాత్రం ఆయన తేల్చి చెప్పారు.
Details
'ఓమ్‌'తో ప్రేక్షకుల ముందుకు ధనుష్
రాజకీయ చర్చల మధ్య ధనుష్ ప్రస్తుతం తన సినిమాలపైనే దృష్టి పెట్టారు. ఆయన నటించిన 'ఓమ్‌'లో మలయాళ సూపర్‌స్టార్‌ మమ్ముట్టి, సాయి పల్లవి, శ్రీలీల కీలక పాత్రల్లో కనిపించనున్నారు.
భారీ అంచనాల మధ్య ఈ సినిమా ఈ నెల 20న థియేటర్లలోకి రానుంది. ఆడియో విడుదల వేడుకలోనే ధనుష్ రాజకీయ వ్యాఖ్యలు చేయడంతో సినిమాకంటే ఈ అంశమే ఎక్కువగా చర్చకు వచ్చింది.
ఒకవైపు సినిమా ప్రమోషన్‌ సాగుతుండగా, మరోవైపు రాజకీయ ఎంట్రీపై వచ్చిన వార్తలకు ఆయన సమాధానం ఇవ్వడం ఆసక్తికరంగా మారింది.
Details
అభిమానులకు క్షమాపణలు చెప్పిన హీరో
ఇదే ఆడియో వేడుకలో అభిమానులకు ఎదురైన ఇబ్బంది కూడా ధనుష్‌ను బాధించింది. కార్యక్రమానికి ఊహించిన దానికంటే ఎక్కువగా జనం తరలిరావడంతో ప్రాంగణంలో తీవ్ర గందరగోళం ఏర్పడింది.
సరైన పాసులు ఉన్నప్పటికీ వేలాది మంది అభిమానులు లోపలికి వెళ్లలేకపోయారు. ఈ ఘటనపై ధనుష్ సోషల్‌ మీడియాలో స్పందిస్తూ, జరిగిన అసౌకర్యానికి పూర్తి బాధ్యత తనదేనని చెప్పారు.
అభిమానులకు క్షమాపణలు కూడా తెలిపారు. తనకు బలం అభిమానులేనని చెప్పిన ధనుష్.. అదే అభిమానులు ఇబ్బంది పడటంపై స్పందించడం ఆయన మాటలకు మరింత బలం చేకూర్చింది.