Dil Raju : పవన్ కళ్యాణ్ సినిమా ఆపే ధైర్యం ఎవడికి లేదు.. ప్రెస్ మీట్ పెట్టి వివరణ ఇచ్చిన దిల్ రాజు
ఈ వార్తాకథనం ఏంటి
జూన్ 1 నుంచి తెలుగు రాష్ట్రాల్లో థియేటర్లు మూసివేయనున్నారని ఇటీవల ప్రచారం జరగడంతో, ఆ విషయంపై ఆంధ్రప్రదేశ్ ఉప ముఖ్యమంత్రి పవన్ కళ్యాణ్ తీవ్ర అసంతృప్తిని వ్యక్తం చేశారు.
ఈ పరిణామాల నేపథ్యంలో రాష్ట్ర సినిమాటోగ్రఫీ శాఖ మంత్రి కందుల దుర్గేశ్ కూడా ఈ వ్యవహారంపై ప్రత్యేకంగా దృష్టి సారించిన విషయం తెలిసిందే.
పవన్ కల్యాణ్ చేసిన వ్యాఖ్యలపై స్పందిస్తూ, ప్రముఖ నిర్మాత అల్లు అరవింద్ ఇప్పటికే మీడియా ఎదుట తన అభిప్రాయాలు వెల్లడించారు.
తాజాగా మరో ప్రముఖ నిర్మాత దిల్ రాజు మీడియా సమావేశం నిర్వహించి ఈ అంశంపై తన ఉద్దేశాలు వెల్లడించారు.
వివరాలు
పవన్ సినిమాను లక్ష్యంగా చేసుకున్న ప్రయత్నంగా తప్పుడు ప్రచారం
దిల్ రాజు ప్రకారం, జూన్ 1 నుంచి థియేటర్లు మూసివేస్తున్నారన్న వార్తలు పూర్తిగా అసత్యమని స్పష్టం చేశారు.
పవన్ కల్యాణ్ నటించిన సినిమాలను ఆపగలిగే శక్తి ఎవరికీ లేదని ఆయన ధైర్యంగా చెప్పారు.
అసలు థియేటర్ల గురించి మాట్లాడే సందర్భంలో, ఇది పవన్ సినిమాను లక్ష్యంగా చేసుకున్న ప్రయత్నంగా తప్పుడు ప్రచారం జరుగుతోందని ఆయన అభిప్రాయపడ్డారు.
తన పేరు ఈ వ్యవహారంలో నేరుగా ఎక్కడా ప్రస్తావించకపోయినా, పరోక్షంగా తనపైనే కొందరు వ్యాఖ్యలు చేస్తూ ఉండవచ్చని భావిస్తున్నట్లు తెలిపారు.
వివరాలు
థియేటర్ల మూసివేత..వాస్తవానికి భవిష్యత్తులో జరిగే అంశం కాదు
థియేటర్ల మూసివేత అనేది వాస్తవానికి భవిష్యత్తులో జరిగే అంశం కాదని దిల్ రాజు స్పష్టంచేశారు.
తాను 30 ఏళ్లకు పైగా సినీ పరిశ్రమలో ఉండగా,ఎప్పుడూ థియేటర్లు పూర్తిగా మూసే పరిస్థితిని చూడలేదని తెలిపారు.
గతంలో కొన్ని సమస్యల నేపథ్యంలో షూటింగులను నిలిపివేసిన సందర్భాలు ఉన్నా,థియేటర్లు మూసివేయడం అన్నది ఎప్పుడూ జరగలేదని ఆయన అన్నారు.
ఈ మొత్తం వివాదం పవన్ కల్యాణ్ చిత్రాన్ని అడ్డుకునేలా మలచబడిందని, ప్రభుత్వాలకు కూడా ఇదే కోణంలో సమాచారం చేరిందని చెప్పారు.
ఎవరికి ఏ ప్రయోజనం ఉన్నా ఉండొచ్చు... కానీ వాళ్లు భక్తితోనైనా, లేక భయంతోనైనా తప్పుడు సమాచారాన్ని అధికారులకు అందించారని ఆరోపించారు.
వివరాలు
సినీ పరిశ్రమ స్థాయి సమావేశంలో థియేటర్లపై స్పష్టత
ఇందుకు సంబంధించి ఏపీ మంత్రి దుర్గేశ్ తనతో ప్రత్యక్షంగా మాట్లాడారని, థియేటర్లు మూసివేయబోనని అప్పుడే ఆయనకు తెలియజేశానని దిల్ రాజు పేర్కొన్నారు.
ఇటీవల జరిగిన సినీ పరిశ్రమ స్థాయి సమావేశంలో థియేటర్లపై స్పష్టత వచ్చిందని చెప్పారు.
కానీ అప్పటికే కొంతమంది ప్రభుత్వ వర్గాలకు తప్పుదారి పట్టించే సమాచారాన్ని ఇచ్చిన కారణంగా, ఈ విషయం పెద్ద దుమారాన్ని రేపిందని వివరించారు.
దిల్ రాజు ప్రకారం, మే 30న "భైరవ" చిత్రం, జూన్ 5న కమల్ హాసన్ చిత్రం, జూన్ 12న పవన్ కల్యాణ్ చిత్రం, జూన్ 20న "కుబేర" విడుదలకు సిద్ధంగా ఉన్నాయి.
అంతేకాకుండా, జూలై, ఆగస్టులో కూడా పలు కొత్త చిత్రాలు విడుదల కానున్నాయని చెప్పారు.
వివరాలు
ఎగ్జిబిటర్లు ఏమి కోరుకుంటున్నారో తెలుసుకోవడం తప్పుకాదు
అలాంటి పరిస్థితుల్లో ఎగ్జిబిటర్లు థియేటర్లు మూసివేయాలనుకుంటారా? అని ఆయన ప్రశ్నించారు. అలా జరిగితే నష్టం ఎవరికి? ఎగ్జిబిటర్లకే కదా! అని స్పష్టం చేశారు.
తర్వాత, సినిమా ప్రదర్శనలో పర్సంటేజ్ విధానం ఉండాలని కొంతమంది ఎగ్జిబిటర్లు ఫిలిం చాంబర్‌కు లేఖ రాసినట్లు వెల్లడించారు.
కానీ,తమ వర్గాలు ఏమన్నా మాట్లాడితే, దానికి వ్యతిరేక ఫలితాలు వస్తాయేమోననే భయం వాళ్లలో ఉందని చెప్పారు.
పర్సంటేజ్ విధానంపై కొన్ని మద్దతు వర్గాలు ఉన్నప్పటికీ, అదే సమయంలో ఈ విధానంతో ఎగ్జిబిటర్లకు కొన్ని సమస్యలు ఎదురవుతున్నాయని వివరించారు.
తూర్పు గోదావరి జిల్లాలో కొంతమంది ఎగ్జిబిటర్లు, డిస్ట్రిబ్యూటర్లు సమావేశమై, గత ఆరు నెలలుగా తమ ఆదాయ పరిస్థితులపై చర్చించారని చెప్పారు.
ఎగ్జిబిటర్లు ఏమి కోరుకుంటున్నారో తెలుసుకోవడం తప్పుకాదని దిల్ రాజు తేల్చిచెప్పారు.