Priyanka Chopra: 'ఎంతో ఆసక్తిగా ఉన్నాను'.. మొదటిసారి SSMB29పై స్పందించిన ప్రియాంక..
ఈ వార్తాకథనం ఏంటి
కథానాయకుడు మహేష్ బాబు, ప్రముఖ దర్శకుడు ఎస్‌.ఎస్‌. రాజమౌళి కలయికలో రూపుదిద్దుకుంటున్న సినిమా 'ఎస్‌ఎస్‌ఎంబీ29' (SSMB29) గురించి సినీప్రేమికులలో ఇప్పటికే భారీ అంచనాలు నెలకొన్నాయి. ఈ చిత్రానికి వర్కింగ్ టైటిల్‌గా 'ఎస్‌ఎస్‌ఎంబీ29' అని నిర్ణయించారు. ఈ చిత్రంలో బాలీవుడ్ స్టార్ నటి ప్రియాంక చోప్రా ఒక ముఖ్యమైన పాత్రలో నటిస్తున్నారని వార్తలు వెలుగులోకి వచ్చాయి. దీంతో ఆమె తాజాగా ఇచ్చిన ప్రతి ఇంటర్వ్యూకు విశేష స్పందన లభిస్తోంది. తాజాగా ఆమె ఓ ప్రముఖ ఆంగ్ల మీడియా సంస్థకు ఇచ్చిన ఇంటర్వ్యూలో మాట్లాడుతూ, ప్రస్తుతం తాను ఒక భారతీయ చిత్రంలో పనిచేస్తున్నానని వెల్లడించారు. దీనిని మహేశ్‌బాబు అభిమానులు పెద్దఎత్తున షేర్ చేస్తూ ఈ సినిమా గురించే ఆమె చెబుతుందంటూ హర్షం వ్యక్తం చేస్తున్నారు.
వివరాలు
భారతీయ ప్రేక్షకులు నాపై చూపే ప్రేమను నేను ఎంతో విలువగా భావిస్తాను
వివాహం అనంతరం హాలీవుడ్‌లో స్థిరపడిన ప్రియాంక తాను ఇక్కడి సినిమాలను మిస్ అవుతున్నట్లు చెప్పారు. ''నేను భారత్‌ను, హిందీ సినిమాలను చాలా మిస్ అవుతున్నాను. ఈ ఏడాది ఒక ఇండియన్ సినిమాను చేస్తున్నాను. ఆ ప్రాజెక్ట్ కోసం ఎంతో ఉత్సాహంగా ఎదురుచూస్తున్నాను. భారతీయ ప్రేక్షకులు నాపై చూపే ప్రేమను నేను ఎంతో విలువగా భావిస్తాను. వారి మద్దతు ఎల్లప్పుడూ ఇలాగే ఉండాలని ఆశిస్తున్నాను'' అని పేర్కొన్నారు. ఇదే ఇంటర్వ్యూలో ప్రముఖ దర్శకుడు మణిరత్నం తెరకెక్కించిన క్లాసిక్ చిత్రం 'బొంబాయి' గురించి కూడా ప్రియాంక ప్రస్తావించారు.
వివరాలు
థియేటర్‌లో 'బొంబాయి' సినిమాను చూసా: ప్రియాంక
ఆమె బాల్యంలో సినిమాలంటే అంతగా ఆసక్తి లేకపోయినా, సంగీతం పట్ల ప్రేమను తన తండ్రి ద్వారా పొందినట్లు చెప్పారు. ''నా నాన్నకి సంగీతం పట్ల అపారమైన ప్రేమ ఉండేది. అందుకే మా ఇంట్లో ఎప్పుడూ సంగీతమే వినిపించేది. నాకు 13 ఏళ్లు ఉన్నప్పుడు ముంబయిలోని ఒక థియేటర్‌లో 'బొంబాయి' సినిమాను చూసాను. అది నాకు తెలిసి చూసిన మొదటి సినిమా. ఆ అనుభవం జీవితాంతం గుర్తుండిపోతుంది. ఈ రోజుకీ ఆ సినిమాను చూస్తే ఒక మాయాజాలంలోకి వెళ్ళినట్లుగా అనిపిస్తుంది'' అని ఆమె తెలిపారు.