Encounter: జమ్మూకశ్మీర్‌లో మరో ఎన్‌కౌంటర్‌.. ఇద్దరు ఉగ్రవాదులు హతం
ఈ వార్తాకథనం ఏంటి
జమ్ముకశ్మీర్‌లోని పూంచ్‌ ప్రాంతంలో బుధవారం ఉదయం ఎదురుకాల్పులు చోటుచేసుకున్నాయి. ఈ ఎన్‌కౌంటర్‌లో ఇద్దరు ఉగ్రవాదులను భద్రతా దళాలు కాల్చిచంపాయి. పహల్గాం ఉగ్రదాడిలో పాల్గొన్న ముగ్గురు ముష్కరులను 'ఆపరేషన్ మహాదేవ్‌' ద్వారా హతమార్చిన కొన్ని రోజుల వ్యవధిలోనే ఈ ఎన్‌కౌంటర్‌ చోటుచేసుకోవడం గమనార్హం. ఈ ఎదురుకాల్పుల్లో మరణించిన ఉగ్రవాదులు లష్కరే తోయిబా సంస్థకు చెందినవారై ఉండొచ్చని అనుమానం వ్యక్తమవుతోంది.
వివరాలు
ఇద్దరు అనుమానాస్పద వ్యక్తుల కదలికలను గుర్తించిన భద్రతా సిబ్బంది
పూంచ్‌ ప్రాంతంలోని జెన్‌ అనే ప్రాంతంలో బుధవారం ఉదయం ఇద్దరు అనుమానాస్పద వ్యక్తుల కదలికలను భద్రతా సిబ్బంది గుర్తించారు. ''పూంచ్‌ సెక్టార్‌లోని కంచె సమీపంలో ఇద్దరు వ్యక్తులు అనుమానాస్పదంగా సంచరిస్తున్న దృశ్యాలను దళాలు గమనించాయి. వెంటనే కాల్పులు ప్రారంభమయ్యాయి. ప్రస్తుతం ఆపరేషన్ కొనసాగుతూనే ఉంది,'' అని ఆర్మీకి చెందిన వైట్‌ నైట్‌ కార్ప్స్‌ ఎక్స్ పేర్కొంది. భారత భూభాగంలోకి చొరబాటుకు ప్రయత్నించిన ఆ ఇద్దరిని భద్రతా బలగాలు మట్టుబెట్టినట్టు జమ్మూ కశ్మీర్‌ డీజీపీ నలీన్‌ ప్రభాత్‌ అధికారికంగా ధ్రువీకరించారు.
వివరాలు
సులేమాన్ అలియాస్ ఆసిఫ్‌తో పాటు అతడి ఇద్దరు అనుచరుల హతం
ఇక 'ఆపరేషన్ మహాదేవ్‌' వివరాలను కేంద్ర హోంమంత్రి అమిత్‌ షా మంగళవారం లోక్‌సభలో ఆపరేషన్ సిందూర్‌పై జరిగిన చర్చ సందర్భంగా వెల్లడించారు. ఆయన వివరించగా, పహల్గాం ఊచకోతలో పాలుపంచుకున్న ముష్కరులను ఈ ఆపరేషన్‌లో హతమార్చామని తెలిపారు. శ్రీనగర్‌ పరిధిలోని అటవీ ప్రాంతంలో సోమవారం చోటుచేసుకున్న మరో ఎన్‌కౌంటర్‌లో ముగ్గురు ఉగ్రవాదులను భద్రతా బలగాలు కాల్చి చంపాయి. 'ఆపరేషన్ మహాదేవ్‌' పేరుతో సైన్యంలో అత్యంత ప్రత్యేకంగా గుర్తింపు పొందిన పారాకమాండో యూనిట్ ఈ దాడిని చేపట్టింది. ఇందులో పహల్గాం ఉగ్రదాడికి ప్రధాన సూత్రధారిగా భావిస్తున్న సులేమాన్ అలియాస్ ఆసిఫ్‌తో పాటు అతడి ఇద్దరు అనుచరులను హతమార్చారు.