Flood Relief Fund: 5 రాష్ట్రాలకు కేంద్రం నిధులు.. ఏపీ, తెలంగాణకు ఎంతంటే..?
ఈ వార్తాకథనం ఏంటి
గత ఏడాది చోటుచేసుకున్న విపత్తులు, వరదాల కారణంగా కేంద్ర ప్రభుత్వం ఈరోజు (ఫిబ్రవరి 19) అదనపు సహాయ నిధులను ప్రకటించింది. కేంద్ర హోంమంత్రి అమిత్ షా నేతృత్వంలోని ఉన్నత స్థాయి కమిటీ మొత్తం ఐదు రాష్ట్రాలకు రూ. 1554.99 కోట్లను మంజూరు చేసింది. 2024లో ఆంధ్రప్రదేశ్, తెలంగాణ, ఒడిశా, నాగాలాండ్, త్రిపుర రాష్ట్రాల్లో సంభవించిన ప్రకృతి విపత్తుల నష్టం దృష్ట్యా, మోదీ ప్రభుత్వం ఆయా రాష్ట్రాలకు నిధులను కేటాయించింది. ముఖ్యంగా, ఆంధ్రప్రదేశ్, తెలంగాణలో ఆకస్మిక వరదలు, కొండచరియలు విరిగిపడటం వంటి ఘటనలు చోటుచేసుకోగా, ఇతర మూడు రాష్ట్రాల్లోనూ విపత్తుల ప్రభావం తీవ్రంగా ఉండటంతో కేంద్రం సమగ్ర సహాయాన్ని ప్రకటించింది.
వివరాలు
అదనపు నిధులను మంజూరు
తాజాగా, కేంద్ర ప్రభుత్వం అదనంగా కేటాయించిన రూ. 1554.99 కోట్ల నిధులలో ఏపీకి రూ. 608.08 కోట్లు, తెలంగాణకు రూ. 231.75 కోట్లు, త్రిపురకు రూ. 288.93 కోట్లు, ఒడిశాకు రూ. 255.24 కోట్లు, నాగాలాండ్‌కు రూ. 170.99 కోట్లు విడుదల చేయాలని నిర్ణయించింది. గతేడాది వరదలు, ఇతర విపత్తుల కారణంగా ఇప్పటికే కొన్ని నిధులు కేటాయించినప్పటికీ, కేంద్ర బృందాలు ప్రభావిత ప్రాంతాలను సందర్శించి సమగ్ర నివేదికలు అందించిన అనంతరం ఈ అదనపు నిధులను మంజూరు చేసింది. అదనంగా,2024-25 ఆర్థిక సంవత్సరంలో SDRF ద్వారా 27 రాష్ట్రాలకు మొత్తం రూ.18,322.80 కోట్లు విడుదల చేయగా,NDRF కింద 18 రాష్ట్రాలకు రూ. 4,808.30 కోట్లు విడుదల చేసినట్లు కేంద్రం వెల్లడించింది.