Chandrababu: 'మూడ్ ఆఫ్ ద నేషన్' పేరిట 'ఇండియా టుడే' స‌ర్వే.. సీఎంల‌లో చంద్ర‌బాబుకు మూడో స్థానం
ఈ వార్తాకథనం ఏంటి
దేశవ్యాప్తంగా అత్యంత ప్రజాదరణ పొందిన ముఖ్యమంత్రుల జాబితాలో ఆంధ్రప్రదేశ్ సీఎం చంద్రబాబు నాయుడు మూడవ స్థానాన్ని దక్కించుకున్నారు. దేశంలోని 28 రాష్ట్రాలు, రెండు కేంద్రపాలిత ప్రాంతాల ముఖ్యమంత్రుల పనితీరును అంచనా వేయడానికి 'ఇండియా టుడే' నిర్వహించిన సర్వేలో ఈ ఫలితాలు వెలువడ్డాయి. 'మూడ్ ఆఫ్ ద నేషన్' పేరిట జరిగిన ఈ సర్వేలో, ఉత్తర్‌ప్రదేశ్ ముఖ్యమంత్రి యోగి ఆదిత్యనాథ్ 36 శాతం ప్రజల మద్దతు పొంది మొదటి స్థానంలో నిలిచారు. ఆయన తరువాత 12.5 శాతం ప్రజాదరణతో పశ్చిమ బెంగాల్ ముఖ్యమంత్రి మమతా బెనర్జీ రెండవ స్థానాన్ని దక్కించుకున్నారు. అదే విధంగా, చంద్రబాబు 7.3 శాతం ఓట్లతో మూడవ స్థానంలో నిలిచారు.
వివరాలు
ఫిబ్రవరిలో నిర్వహించిన ఇదే సర్వేలో చంద్రబాబు ఐదవ స్థానం
బిహార్ సీఎం 4.3 శాతం, తమిళనాడు ముఖ్యమంత్రి ఎంకే స్టాలిన్ 3.8 శాతం మద్దతుతో వరుసగా నాలుగో, ఐదో స్థానాలు పొందారు. గమనించదగ్గ విషయం ఏమిటంటే, ఈ సంవత్సరం ఫిబ్రవరిలో నిర్వహించిన ఇదే సర్వేలో చంద్రబాబు ఐదవ స్థానంలో ఉన్నారు. ఇప్పుడు మూడో స్థానానికి ఎదిగారు. ఇకపోతే, 'ఇండియా టుడే' 2001 నుంచి ప్రతి ఏడాది రెండుసార్లు దేశంలోని కేంద్ర, రాష్ట్ర ప్రభుత్వాల పనితీరు ఎలా ఉందన్న దానిపై ప్రజాభిప్రాయాలను సేకరించేందుకు 'మూడ్ ఆఫ్ ద నేషన్' సర్వేను నిరంతరం నిర్వహిస్తోంది.