Asia power index: జపాన్‌ని దాటేసి.. మూడో అతిపెద్ద శక్తిగా భారత్
ఈ వార్తాకథనం ఏంటి
భారతదేశం ప్రపంచవ్యాప్తంగా తన ఖ్యాతిని మరింత పెంచుకుంటోంది. ప్రస్తుతం ఉన్న ప్రపంచ సమస్యల పరిష్కారానికి భారతదేశం చొరవ చూపకపోతే, ఇతర దేశాలు ముందుకు సాగలేవని పరిస్థితి నెలకొంది. ఆర్థిక పరంగా బలపడడం,ప్రపంచంలో అతిపెద్ద ప్రజాస్వామ్య దేశంగా ఉండటం భారతదేశానికి ప్రత్యేకతను అందిస్తున్నాయి. ఈ నేపథ్యంలో, ''ఆసియా పవర్ ఇండెక్స్''లో భారతదేశం పునరుద్ధరించిన శక్తిని ప్రదర్శించింది. జపాన్‌ను మించి మూడవ అత్యంత శక్తివంతమైన దేశంగా అవతరించింది. ఆర్థిక పునరుద్ధరణ, బహుళవాద అనుబంధాలతో భారత ప్రభావం మరింత పెరిగింది. భారతదేశం ఆసియా పవర్ ఇండెక్స్‌లో మూడవ స్థానానికి చేరుకోవడానికి ప్రధాన కారణాలు బలమైన ఆర్థిక వృద్ధి, యువ జనాభా, ప్రాంతీయ భద్రతా అంశాలు.
వివరాలు
జపాన్‌ని దాటేసి అమెరికా-చైనాల తర్వాతి స్థానం..
ఇవి భారతదేశ భౌగోళిక రాజకీయ స్థాయిని మెరుగుపరిచి, దాని ప్రభావాన్ని పెంచుతున్నాయి. "భారతదేశం జపాన్‌ను అధిగమించి మూడవ అతిపెద్ద శక్తిగా అవతరించడం ఒక కీలక మార్పు, ఇది పెరుగుతున్న భౌగోళిక రాజకీయ స్థాయిని ప్రతిబింబిస్తుంది" అని సంబంధిత మంత్రిత్వ శాఖ పేర్కొంది. ఈ రేటింగ్‌లో మొదటి రెండు స్థానాలు అమెరికా,చైనాకు చెందగా,2018లో లోవీ ఇన్‌స్టిట్యూట్ ప్రారంభించిన ఆసియా పవర్ ఇండెక్స్ ఆసియా-పసిఫిక్ ప్రాంతంలోని శక్తి డైనమిక్స్‌ను రేటింగ్ చేస్తుంది. ఈ సమీక్ష 27దేశాలను అంచనా వేస్తుంది. కోవిడ్-19 మహమ్మారి సమయంలో అమెరికా,చైనా, యూరోపియన్ యూనియన్ దేశాల ఆర్థిక వ్యవస్థలు తీవ్రంగా దెబ్బతిన్నప్పటికీ, భారత ఆర్థిక వ్యవస్థ బలంగా కొనసాగింది,ఇది కూడా పవర్ ఇండెక్స్ రేటింగ్‌లో భారత్‌కు ప్రాధాన్యతనిచ్చింది.