India: ఉక్రెయిన్‌ యుద్ధం ఆపే ప్రయత్నాలకు మద్దతు ఇవ్వడానికి భారత్ సిద్ధం: UNలో రాయబారి హరీష్
ఈ వార్తాకథనం ఏంటి
రష్యా-ఉక్రెయిన్‌ల మధ్య యుద్ధం చాలాకాలంగా కొనసాగుతున్న సంగతి తెలిసిందే. ఈ నేపథ్యంలో ఉక్రెయిన్‌లో శాంతి నెలకొనే మార్గాల కోసం జరిగే ప్రతి ప్రయత్నానికీ భారత్ మద్దతు ఇస్తుందని, ఐక్యరాజ్య సమితిలో భారత శాశ్వత ప్రతినిధి పర్వతనేని హరీశ్ స్పష్టం చేశారు. ఉక్రెయిన్‌లో ఏర్పడిన పరిస్థితులు భారత్‌కు ఆందోళన కలిగిస్తున్నాయని ఆయన తెలిపారు. యుద్ధం కారణంగా నిరపరాధులు ప్రాణాలు కోల్పోవడం అంగీకారయోగ్యం కాదని స్పష్టం చేశారు. యుద్ధరంగంలో సమస్యలకు పరిష్కారం దొరకదని హరీశ్ స్పష్టంచేశారు. సంఘర్షణలను ఆపేందుకు జరుగుతున్న అన్ని ప్రయత్నాలను భారత్ ఎల్లప్పుడూ సమర్థిస్తుందని ఆయన పేర్కొన్నారు. దౌత్యపరమైన చర్చల ద్వారానే ఈ యుద్ధానికి ముగింపు లభిస్తుందని భారత్ విశ్వసిస్తోందని అన్నారు.
వివరాలు
పుతిన్‌, జెలెన్‌స్కీతో పాటు యూరోపియన్‌ నాయకులతో మోదీ పలుమార్లు సంభాషణలు
ఇటీవల ఆ దిశగా జరుగుతున్న కొన్ని చర్యలను భారత ప్రభుత్వం స్వాగతిస్తున్నదని కూడా ఆయన జోడించారు. యుద్ధం నిలిపివేత అంశంపై అమెరికా అధ్యక్షుడు డొనాల్డ్‌ ట్రంప్, రష్యా అధ్యక్షుడు వ్లాదిమిర్‌ పుతిన్‌ల మధ్య ఇటీవల అలాస్కాలో జరిగిన సమావేశాన్ని హరీశ్ ప్రత్యేకంగా ప్రస్తావించారు. అనంతరం వాషింగ్టన్‌లో ఉక్రెయిన్‌ అధ్యక్షుడు జెలెన్‌స్కీతో పాటు యూరోపియన్‌ దేశాల నేతలతో ట్రంప్ చర్చించిన విషయాన్ని గుర్తుచేశారు. ఇదే విధంగా భారత ప్రధాని నరేంద్ర మోదీ కూడా పుతిన్‌, జెలెన్‌స్కీతో పాటు యూరోపియన్‌ నాయకులతో పలుమార్లు సంభాషణలు జరిపారని హరీశ్ తెలిపారు. ఈ కలయికలన్నీ కలిసి ఫలించి, చివరికి కీవ్‌లో శాశ్వత శాంతి నెలకొంటుందని భారత్ నమ్ముతోందని ఆయన స్పష్టం చేశారు.
వివరాలు
యుద్ధాల శకం కాదు
ప్రపంచవ్యాప్తంగా ఈ యుద్ధం ప్రభావం చూపుతున్నందుకు భారత్ విచారం వ్యక్తం చేస్తోందని ఆయన పేర్కొన్నారు. వీలైనంత త్వరగా ఈ యుద్ధం ముగించడం అన్ని దేశాలకూ, సమస్త ప్రజలకూ మేలు చేస్తుందని చెప్పారు. ఇది యుద్ధాల కాలం కాదని, శాంతి-అభివృద్ధుల కాలమని భారత ప్రధాని నరేంద్ర మోదీ అనేక సందర్భాల్లో ఉద్ఘాటించిన విషయాన్ని హరీశ్ మరోసారి గుర్తు చేశారు.