Maharashtra: మహారాష్ట్రలో దారుణం.. నర్సింగ్ విద్యార్థినిపై ఆటో డ్రైవర్ అత్యాచారం
కోల్‌కతాలో జూనియర్ వైద్యురాలిపై జరిగిన హత్యాచారం ఘటన దేశవ్యాప్తంగా దిగ్భ్రాంతికి గురి చేసింది. ఈ తరుణంలో మహారాష్ట్రలో మరో విద్యార్థిని పట్ల లైంగిక దాడి జరగడం సర్వత్రా ఆందోళన కలిగిస్తోంది. మహారాష్ట్రలో మరో అత్యాచార ఘటన చోటుచేసుకుంది. రత్నగిరి జిల్లా నర్సింగ్ విద్యార్థిని (20)పై ఆటోడ్రైవర్ అత్యాచారానికి పాల్పడటం తీవ్ర కలకలం రేపుతోంది. పోలీసులు కథనం మేరకు బాధితురాలు తరగతులు ముగిసిన అనంతరం ఇంటికి చేరుకోవడానికి ఆటో ఎక్కింది. డ్రైవర్ ఆమెతో మాటలు కలిపి, తాగడానికి నీళ్లు అందజేశాడు. ఆ నీటిలో డ్రైవర్ అప్పటికే మత్తుమందు కలపడంతో బాధితురాలు స్పృహ తప్పింది.
నిందితుడిని కఠినంగా శిక్షించాలని డిమాండ్
దీంతో ఆమెను నిర్మానుష్య ప్రదేశానికి తీసుకెళ్లి అత్యాచారానికి పాల్పడ్డాడు. అనంతరం అక్కడి నుంచి పరారయ్యాడు. అపస్మారక స్థితిలో ఉన్న బాధితురాలిని స్థానికులు గుర్తించారు. అనంతరం ఓ ఆసుపత్రికి తరలించారు. లైంగిక దాడి జరిగినట్లు గుర్తించిన విద్యార్థిని, కుటుంబ సభ్యులకు సమాచారం ఇచ్చింది. ఇక పోలీసులు ఈ ఘటనపై కేసు నమోదు చేసి, నిందితుడి కోసం గాలింపు చర్యలు చేపట్టారు. నిందితుడిని కఠినంగా శిక్షించాలని కోరుతూ బాధితురాలి కుటుంబ సభ్యులు, స్థానికులు, డాక్టర్లు, నర్సులు పెద్ద ఎత్తున రోడ్డుపై ధర్నా చేశారు.
