నమస్తే ఆంధ్రప్రదేశ్: ఏపీలో న్యూస్ పేపర్ ఏర్పాటుపై కేసీఆర్ స్పెషల్ ఫోకస్
ఈ వార్తాకథనం ఏంటి
బీఆర్‌ఎస్‌ను ఆంధ్రప్రదేశ్లో విస్తరింపజేసేందుకు కేసీఆర్ ప్రత్యేక దృష్టిసారిస్తున్నట్లు కనిపిస్తోంది. ఆంధ్రప్రదేశ్లో బీఆర్ఎస్ కోసమే సొంతంగా న్యూస్‌పేపర్‌ పెట్టే యోచనలో కేసీఆర్ ఉన్నట్లు ప్రచారం జరుగుతోంది. ఆ న్యూస్‌పేపర్‌ పేరును కూడా 'నమస్తే ఆంధ్రప్రదేశ్'గా ఖారారు చేసినట్లు తెలుస్తోంది. ఇప్పటికే ఆంధ్రప్రదేశ్ పార్టీ అధ్యక్షుడిగా జనసేన మాజీ నేత తోట చంద్రశేఖర్‌ను సీఎం కేసీఆర్ నియమించారు. అలాగే, 2024లో మొత్తం 175స్థానాల్లో పోటీ చేస్తానని కేసీఆర్ ప్రకటించారు. ఇప్పుడు ఆంధ్రప్రదేశ్ కోసమే సొంతంగా న్యూస్‌పేపర్‌ పెట్టేందుకు సిద్ధమవుతున్నట్లు వార్తలు వస్తున్నాయి.
ఆంధ్రప్రదేశ్
99టీవీ ఛానెల్ ఏపీ అధ్యక్షుడు తోట చంద్రశేఖర్‌‌దే
తెలంగాణలో బీఆర్ఎస్ కోసం 'నమస్తే తెలంగాణ' అనే వార్తాపత్రిక పని చేస్తోంది. ప్రత్యేక న్యూస్ ఛానెల్ టీ-న్యూస్ కూడా ఉంది. తోట చంద్రశేఖర్‌కి ఇప్పటికే న్యూస్ ఛానెల్ 99టీవీ ఉంది. కాబట్టి ఆంధ్రప్రదేశ్లో మరో ఛానెల్ అవసరం లేదు. సొంతంగా పేపర్ ఉంటే, పార్టీ ఉద్దేశాలను ప్రజలకు మరింత చేరువగా తీసుకెళ్లొచ్చని కేసీఆర్ భావిస్తున్నట్లు సమాచారం. ప్రస్తుతం ఆంధ్రప్రదేశ్లో ఈనాడు, సాక్షి, ఆంధ్రజ్యోతి పత్రికలు పూర్తిగా ఆధిపత్యం చెలాయిస్తున్నాయి. ఈ నేపథ్యంలో కేసీఆర్ పెట్టబోయే 'నమస్తే ఆంధ్రప్రదేశ్' పేపర్ ఏ మేరకు ప్రజలను ఆకర్షిస్తుందనేది ఆసక్తికరంగా మారింది.