దిల్లీ ప్రభుత్వంలో కొత్త మంత్రులు; సౌరభ్ భరద్వాజ్, అతిషికి అవకాశం
ఈ వార్తాకథనం ఏంటి
సత్యేందర్ జైన్, మనీష్ సిసోడియా తమ మంత్రి పదవులకు రాజీనామా చేసిన తర్వాత వారి స్థానంలో సౌరభ్ భరద్వాజ్, అతిషిని మంత్రివర్గంలోకి తీసుకోవాలని సీఎం కేజ్రీవాల్ నిర్ణయించారు. ఈ మేరకు వారి పేర్లను లెఫ్టినెంట్ గవర్నర్‌కు పంపారు.
సత్యేందర్ జైన్ గతేడాది మనీ లాండరింగ్ కేసులో అరెస్టు అయ్యాడు. అప్పటి నుంచి అతని శాఖలను సిసోడియాకు అప్పగించారు. అప్పటి నుంచి సిసోడియా దాదాపు 18శాఖలను నిర్వర్తిస్తున్నారు. తాజాగా సిసోడియా కూడా అరెస్టు కావడంతో కేజ్రీవాల్‌కు మంత్రి వర్గ విస్తరణ అనివార్యమైంది.
ఈ క్రమంలోనే పార్టీలో యాక్టివ్‌గా ఉండే సౌరభ్ భరద్వాజ్, అతిషిని మంత్రివర్గంలోకి తీసుకోవాలని కేజ్రీవాల్ నిర్ణయించారు.
సౌరభ్ భరద్వాజ్ గ్రేటర్ కైలాష్ నియోజకవర్గం ఎమ్మెల్యేగా ఉండగా, అతిషి కల్కాజీకి ప్రాతినిధ్యం వహిస్తున్నారు.
దిల్లీ
సిసోడియా, జైన్‌ల రాజీనామాలను ఆమోదించాలని రాష్ట్రపతికి సిఫార్సు చేసిన ఎల్జీ
దిల్లీ మంత్రివర్గం చాలా చిన్నదని, చాలా ముఖ్యమైన శాఖలను సత్యేందర్ జైన్, మనీష్ సిసోడియా నిర్వహించేవారని సౌరభ్ భరద్వాజ్ చెప్పారు. పని పరంగా వెనుకబడి ఉండకుండా ఉండటానికి, త్వరలో ఇద్దరు కొత్త మంత్రులను కేజ్రీవాల్ నియమించనున్నారని భరద్వాజ్ మంగళవారం చెప్పారు. భరద్వాజ్ చెప్పినట్లుగానే కేజీవాల్ ఇద్దరిని మంత్రివర్గంలోకి తీసుకుంటున్నారు.
సిసోడియా, జైన్‌ల రాజీనామాలను ఆమోదించాలని రాష్ట్రపతి ద్రౌపది ముర్ముకు దిల్లీ ఎల్జీ సిఫార్సు చేశారు. వారి రాజీనామాలను కేజ్రీవాల్ మంగళవారం ఆమోదించారు.
2013 అసెంబ్లీ ఎన్నికల పార్టీ మ్యానిఫెస్టో ముసాయిదా కమిటీలో అతిషి కీలక సభ్యురాలు. అతిషి విద్యా మంత్రిత్వ శాఖలో మనీష్ సిసోడియా సలహాదారుగా పనిచేశారు.