NITI Aayog: నేడు దిల్లీలో మోడీ నేతృత్వంలో నీతి ఆయోగ్ పాలక మండలి భేటీ
ఈ వార్తాకథనం ఏంటి
ప్రధాని నరేంద్ర మోదీ అధ్యక్షతన శనివారం దిల్లీలో నీతి ఆయోగ్ పాలక మండలి సమావేశం జరుగనుంది.
ఉదయం 9 గంటలకు 'వికసిత్ రాజ్య, వికసిత్ భారత్-2047' అనే ఇతివృత్తాన్ని ఆధారంగా చేసుకొని ఈ సమావేశం జరగనుంది.
స్వాతంత్య్రం 100 ఏళ్లకు, అంటే 2047 నాటికి భారత్‌ను పూర్తి అభివృద్ధి చెందిన దేశంగా తీర్చిదిద్దే లక్ష్యంతో సమావేశంలో విస్తృతంగా చర్చలు నిర్వహించనున్నారు.
ఈ భేటీకి అన్ని రాష్ట్రాల ముఖ్యమంత్రులు, కేంద్ర పాలిత ప్రాంతాల లెఫ్టినెంట్ గవర్నర్లు, నీతి ఆయోగ్ ఉపాధ్యక్షుడు, పూర్తికాలపు సభ్యులు, ప్రత్యేక ఆహ్వానితులు హాజరయ్యే అవకాశం ఉంది.
కేంద్ర ప్రభుత్వ నూతన పథకాల రూపకల్పన, అమలులో రాష్ట్రాల భాగస్వామ్యాన్ని పెంచేందుకు ఈ సమావేశం కీలకంగా మారనుంది.
Details
రెండు తెలుగు రాష్ట్రాల ముఖ్యమంత్రులు హాజరయ్యే అవకాశం
ప్రగతి మైదాన్‌లోని భారత్ మండపంలో జరిగే ఈ సమావేశానికి రెండు తెలుగు రాష్ట్రాల ముఖ్యమంత్రులు — ఆంధ్రప్రదేశ్ సీఎం నారా చంద్రబాబు నాయుడు, తెలంగాణ సీఎం రేవంత్ రెడ్డి హాజరుకానున్నారు.
ప్రత్యేకించి, ఇటీవల జరిగిన ఆపరేషన్ సిందూర్ తరువాత తొలిసారి పాలక మండలి భేటీ కావడం ఈ సమావేశానికి ప్రాధాన్యతను కల్పిస్తోంది.
సహకార సమాఖ్య స్ఫూర్తిని బలోపేతం చేస్తూ, జాతీయ దృష్టికోణానికి రాష్ట్రాల ఆకాంక్షలను అనుసంధానించడమే ఈ భేటీ ప్రధాన ఉద్దేశంగా ఉంది.
వికసిత్ భారత్ లక్ష్యాన్ని సాధించేందుకు రాష్ట్రాల భాగస్వామ్యంతో కలిసికట్టుగా కార్యాచరణ రూపురేఖలు రూపొందించనున్నట్లు అధికారులు తెలిపారు.
2047 నాటికి భారత్‌ను శక్తివంతమైన అభివృద్ధి చెందిన దేశంగా మలచేందుకు ఈ సమావేశం ఒక కీలక మైలురాయిగా నిలవనుంది.