PM Modi: 'నితిన్ నబిన్ నా బాస్, నేను బిజెపి కార్యకర్తను': ప్రధాని మోదీ
ఈ వార్తాకథనం ఏంటి
తన జీవితంలో మూడుసార్లు దేశ ప్రధాని కావడమే అతి పెద్ద గౌరవమని కాదు... 50 ఏళ్ల వయసులో ముఖ్యమంత్రి కావడమే గొప్ప విజయమని కూడా కాదని ప్రధాని నరేంద్ర మోదీ స్పష్టం చేశారు. బీజేపీ జాతీయ అధ్యక్షుడిగా నితిన్ నబీన్ సిన్హా ప్రమాణస్వీకార కార్యక్రమంలో పాల్గొన్న ప్రధాని 'పార్టీ విషయాల విషయానికి వస్తే నేను ఒక కార్యకర్తను. ఇప్పుడు నితిన్ నబిన్ నా బాస్.'' అని పేర్కొన్నారు. ఢిల్లీలోని బీజేపీ ప్రధాన కార్యాలయంలో జరిగిన ఈ కార్యక్రమానికి ఆయన హాజరై ప్రసంగించారు.
వివరాలు
నేను బీజేపీ కార్యకర్తను. అదే నాకు అత్యంత గర్వకారణం: మోదీ
''దేశ ప్రధాని కావడం, మూడోసారి ఆ బాధ్యత చేపట్టడం, 50 ఏళ్ల వయసులో ముఖ్యమంత్రి కావడం, 25 ఏళ్లుగా నిరంతరం పాలనలో ఉండడం... ఇవన్నీ ప్రజలు గొప్పగా భావించవచ్చు. అవన్నీ నిజమే. కానీ ఇవన్నిటికంటే నా జీవితంలో అత్యంత విలువైన విషయం ఒక్కటే. నేను బీజేపీ కార్యకర్తను. అదే నాకు అత్యంత గర్వకారణం. పార్టీ విషయానికి వస్తే నేను ఇప్పటికీ ఒక కార్యకర్తనే. ఇక నుంచి నితిన్ నబిన్ నా బాస్'' అని మోడీ వ్యాఖ్యానించారు. ప్రజలకు సేవ చేయడమే బీజేపీ రాజకీయాల కేంద్రబిందువని ప్రధాని తెలిపారు.
వివరాలు
నితిన్ నబిన్ ప్రమాణస్వీకారం
''మేము అధికారాన్ని ఆనందం కోసం ఉపయోగించే సాధనంగా కాకుండా... సేవ చేసే మాధ్యమంగా మార్చాం. అందుకే బీజేపీపై ప్రజల విశ్వాసం రోజురోజుకీ బలపడుతోంది. గత 11 ఏళ్ల ప్రయాణాన్ని పరిశీలిస్తే... అది ప్రజల నమ్మకాన్ని సంపాదించుకున్న అద్భుతమైన ప్రయాణంగా నిలిచింది'' అని మోదీ అన్నారు. బీజేపీ జాతీయ అధ్యక్షుడిగా నితిన్ నబిన్ (45) బాధ్యతలు స్వీకరించారు. ప్రధాని నరేంద్ర మోదీ సమక్షంలో ఢిల్లీలోని పార్టీ ప్రధాన కార్యాలయంలో ఆయన ప్రమాణస్వీకారం చేశారు. ఈ కార్యక్రమానికి కేంద్ర మంత్రులు అమిత్ షా, జేపీ నడ్డా సహా పలువురు ఎంపీలు, పార్టీ సీనియర్ నేతలు హాజరయ్యారు. చిన్న వయసులోనే పార్టీ జాతీయ అధ్యక్ష స్థాయికి చేరిన నాయకుడిగా నితిన్ నబిన్ గుర్తింపు పొందారు.
వివరాలు
2006లో రాజకీయ రంగప్రవేశం
1980లో రాంచీలో జన్మించిన నితిన్ నబిన్, తండ్రి కిశోర్ ప్రసాద్ సిన్హా మృతి అనంతరం 2006లో రాజకీయ రంగప్రవేశం చేశారు. అదే ఏడాది జరిగిన ఉప ఎన్నికల్లో పాట్నా వెస్ట్ అసెంబ్లీ నియోజకవర్గం నుంచి ఎమ్మెల్యేగా గెలుపొందారు. అనంతరం బంకిపూర్ అసెంబ్లీ నియోజకవర్గం నుంచి 2010, 2015, 2020, 2025 ఎన్నికల్లో వరుసగా విజయం సాధించారు.
వివరాలు
ఈ ఎన్నికలు నితిన్ నబిన్కు తొలి పరీక్ష
ఆర్ఎస్ఎస్ నేపథ్యంతో అంచెలంచెలుగా ఎదిగిన నితిన్ నబిన్, గతేడాది డిసెంబర్ 14న పార్టీ కార్యనిర్వాహక అధ్యక్షుడిగా ఎన్నికయ్యారు. అప్పుడే ఆయనకే పార్టీ పగ్గాలు అప్పగించే అవకాశం ఉందన్న ప్రచారం జరిగింది. చివరికి అదే నిజమైంది. ఇక జాతీయ అధ్యక్షుడిగా బాధ్యతలు చేపట్టిన నితిన్ నబిన్ ముందున్న సవాళ్లు పెద్దవే. త్వరలో పశ్చిమ బెంగాల్, తమిళనాడు, కేరళ, అస్సాం రాష్ట్రాల్లో జరగనున్న అసెంబ్లీ ఎన్నికలు ఆయనకు తొలి పరీక్ష కానుంది.