Jyoti Malhotra: పాకిస్తాన్ గూఢచారి జ్యోతి మల్హోత్రాను ఇన్ఫ్లుయెన్సుర్ గా నియమించుకున్న కేరళ టూరిజం.. ఆర్టీఐలో వెల్లడి..
ఈ వార్తాకథనం ఏంటి
పాకిస్థాన్‌ కోసం గూఢచర్యం చేశారన్న ఆరోపణలతో అరెస్టైన హర్యానాకు చెందిన ట్రావెల్ వ్లాగర్ జ్యోతి మల్హోత్రా సంబంధించి విచారణ కొనసాగుతున్న సందర్భంగా ఆమెకు సంబంధించిన అనేక వివాదాస్పద అంశాలు ఒక్కొక్కటిగా వెలుగు చూస్తున్నాయి. రాష్ట్ర పర్యాటక విభాగం నిర్వహించిన ప్రచార కార్యక్రమంలో అతిథిగా భాగంగా ఆమె కేరళను సందర్శించిన విషయమూ తాజాగా వెలుగు చూసింది. సమాచార హక్కు చట్టం (ఆర్‌టీఐ) కింద దాఖలైన ఒక అభ్యర్థనకు వచ్చిన అధికారిక సమాధానంలో, జ్యోతి మల్హోత్రా దక్షిణ భారత పర్యాటక ప్రచార కార్యక్రమంలో భాగంగా ఎంపికైన వ్యక్తుల్లో ఒకరని వెల్లడయ్యింది. మొత్తం 41 మంది సోషల్ మీడియా ఇన్‌ఫ్లుయెన్సర్లను ఆ కార్యక్రమం కోసం ఎంపిక చేయగా, వారిలో ఆమె కూడా ఉన్నారు.
వివరాలు
రాష్ట్ర ప్రభుత్వంపై తీవ్ర విమర్శలు
ఈ పర్యటన ఖర్చులన్నింటికీ - ప్రయాణం, వసతి, ఆహారం మొదలైన వాటికి - కేరళ ప్రభుత్వం నిధులు కేటాయించింది. అంతేకాక, ఈ ఇన్‌ఫ్లుయెన్సర్లు వీడియోలు తయారుచేయడంలో సులభతరం చేయడానికి ఒక ప్రైవేట్ ఏజెన్సీని కూడా నియమించింది. జ్యోతి మల్హోత్రా పర్యటనకు ప్రభుత్వ సహకారం ఉన్నదని బహిరంగంగా బయటపడిన తర్వాత, రాష్ట్ర ప్రభుత్వం తీవ్ర విమర్శలకు గురైంది. విపక్షాలు ఈ ఘటనపై మండిపడుతూ,సరైన తనిఖీలు లేకుండా విదేశీ గూఢచారులను ఆహ్వానించారని, ఇది ప్రభుత్వ నిర్లక్ష్యానికి నిదర్శనమని ఆరోపించాయి. దీనిపై స్పందించిన పర్యాటక శాఖ మంత్రి పీఏ మహమ్మద్ రియాస్ మాట్లాడుతూ, జ్యోతి మల్హోత్రాను ఇతర ఇన్‌ఫ్లుయెన్సర్లతో పాటు ఆహ్వానించిన విషయాన్ని ఆయన అంగీకరించారు.
వివరాలు
పహల్గామ్ ఉగ్రదాడి నేపథ్యంలో జ్యోతి మల్హోత్రా అరెస్టు
ఈ కార్యక్రమం పూర్తిగా పర్యాటకాన్ని ప్రోత్సహించేందుకు నిర్వహించిందని, పూర్తిగా పారదర్శకంగా నిర్వహించబడిందని ఆయన వివరించారు. ఎవరు కూడా గూఢచారులని ముందే తెలుసుకోవడం సాధ్యపడదని ఆయన పేర్కొన్నారు. జ్యోతి మల్హోత్రా తన కేరళ పర్యటనలో కొచ్చి, కన్నూర్, కోజికోడ్, అలప్పుజ, మున్నార్, తిరువనంతపురం వంటి ప్రముఖ ప్రాంతాలను సందర్శించారు. ఆమె ఈ ప్రయాణ అనుభవాలను తన యూట్యూబ్ ఛానల్‌తో పాటు ఇతర సోషల్ మీడియా వేదికల్లో కూడా పంచుకున్నారు. కాగా, పహల్గామ్ ఉగ్రదాడి, ఆపరేషన్ సిందూర్ వంటి పరిణామాల నేపథ్యంలో, 2025 మే నెలలో ఆమెను అరెస్టు చేశారు. దర్యాప్తులో ఆమె పహల్గామ్ దాడికి ముందు పాకిస్తాన్‌కి వెళ్లినట్టు పోలీసులకు తెలిసింది.