Ayyannapatrudu: ఏపీ అసెంబ్లీలో త్వరలో కాగిత రహిత కార్యకలాపాలు: అయ్యన్నపాత్రుడు
ఆంధ్రప్రదేశ్ శాసనవ్యవస్థలో ఆధునిక సమాచార, సాంకేతిక పరిజ్ఞానాన్ని అనుసరించేందుకు అడుగులు వేస్తున్నామని శాసన సభాపతి సీహెచ్‌ అయ్యన్నపాత్రుడు తెలిపారు. ఆస్ట్రేలియాలోని సిడ్నీలో జరుగుతున్న 67వ కామన్వెల్త్‌ పార్లమెంటరీ మహాసభల్లో బుధవారం 'ఉత్తమ పార్లమెంటరీ ప్రజాస్వామ్యం-ప్రతిష్ఠ' అంశంపై చర్చ సందర్భంగా ఆయన మాట్లాడారు. ప్రపంచవ్యాప్తంగా ఉన్న ఉత్తమ విధానాలను ఏపీ శాసనవ్యవస్థ స్వీకరించేందుకు సిద్ధంగా ఉందని చెప్పారు.
శాసనసభ పనిదినాలు తక్కువగా ఉండడం.. ఆశించిన ఫలితాలను సాధించడం కష్టంగా మారింది: అయ్యన్నపాత్రుడు
కాగిత రహిత కార్యకలాపాలను ప్రారంభించేందుకు త్వరలో చర్యలు తీసుకుంటామని పేర్కొన్న ఆయన, శాసనసభ పనిదినాలు తక్కువగా ఉండడం వల్ల ఆశించిన ఫలితాలను సాధించడం కష్టంగా మారుతున్నదని అభిప్రాయపడ్డారు. ప్రజా సమస్యల పరిష్కారం కోసం ఏపీ శాసనసభ ఏడాదికి కనీసం 70 రోజుల పాటు సమావేశాలు నిర్వహించడం అవసరమని చెప్పారు. పారదర్శకత శాసన, న్యాయ, కార్యనిర్వాహక వ్యవస్థలను ప్రత్యేకంగా నిలిపి, చట్టసభల సమావేశాలను ప్రత్యక్ష ప్రసారం చేయడాన్ని కూడా ఆయన వివరించారు. శాసనమండలి ఛైర్మన్‌ కొయ్యే మోషేను రాజు కూడా సభలో పాల్గొన్నారు.
