PM Modi: రాజ్యాంగ దినోత్సవం పురస్కరించుకొని మోదీ, అమిత్ షా శుభాకాంక్షలు
ఈ వార్తాకథనం ఏంటి
రాజ్యాంగం అమలులోకి వచ్చి 75 ఏళ్లు పూర్తవుతున్న సందర్భాన్ని పురస్కరించుకొని ఈరోజు (మంగళవారం) పాత పార్లమెంటు ప్రాంగణంలోని సెంట్రల్ హాల్‌లో రాజ్యాంగ దినోత్సవాన్ని ఘనంగా నిర్వహించారు.
ఈ సందర్భంగా ప్రధాన మంత్రి నరేంద్ర మోదీ, హోం మంత్రి అమిత్ షా భారత ప్రజలందరికీ రాజ్యాంగ దినోత్సవ శుభాకాంక్షలు తెలుపుతూ, పటిష్ఠమైన భారత్ నిర్మాణానికి ప్రతిజ్ఞ చేయాలని పిలుపునిచ్చారు.
వివరాలు
రాజ్యాంగం, దేశాభివృద్ధికి కీలకమైన పునాది
హోం మంత్రి అమిత్ షా, రాజ్యాంగం భారత ప్రజాస్వామ్యానికి మూర్తిరూపమైన శక్తి అని అభివర్ణించారు.
సమాన హక్కులు అందరికీ నిర్ధారిస్తూ, జాతీయ ఐక్యతకు తోడ్పడుతున్న ఈ రాజ్యాంగం, దేశాభివృద్ధికి కీలకమైన పునాది అని పేర్కొన్నారు.
రాజ్యాంగాన్ని రూపకల్పన చేసిన మహానుభావుల త్యాగాలను స్మరించుకుంటూ ఈ వేడుకలను జరుపుకోవాలని ఆయన ప్రజలను కోరారు.
రాజ్యాంగం ఒక పుస్తకం మాత్రమే కాకుండా, అందులోని మార్గదర్శక సూత్రాలను నిష్టగా అమలు చేయడం ప్రధాన లక్ష్యమై ఉండాలని ఆయన అన్నారు.
వివరాలు
వేడుకలలో రాష్ట్రపతి, ఉపరాష్ట్రపతి, లోక్‌సభ స్పీకర్ ప్రసంగం
ఈ ప్రత్యేక వేడుకల్లో రాష్ట్రపతి ద్రౌపది ముర్ము, ఉపరాష్ట్రపతి జగదీప్ ధన్కర్, లోక్‌సభ స్పీకర్ ఓం బిర్లా తదితరులు పాల్గొంటారని పార్లమెంటరీ వ్యవహారాల మంత్రి కిరెణ్ రిజిజు తెలిపారు.
ఈ సందర్భంగా ఇండియా కూటమి నేతలు, కార్యక్రమంలో తమకు కూడా మాట్లాడే అవకాశం ఇవ్వాలంటూ స్పీకర్ ఓం బిర్లాకు లేఖ రాశారు.
దీనిపై స్పందించిన రిజిజు, ఈ వేడుకల్లో రాష్ట్రపతి, ఉపరాష్ట్రపతి, లోక్‌సభ స్పీకర్ మాత్రమే ప్రసంగిస్తారని, ప్రధాని మోదీ ఈ కార్యక్రమంలో ప్రసంగించరని స్పష్టంచేశారు.
అయితే, వేడుకల అనంతరం జరిగే మరో కార్యక్రమంలో ప్రధాని ప్రసంగించనున్నట్లు సంబంధిత వర్గాలు పేర్కొన్నాయి.