PM Modi: మహారాష్ట్ర ర్యాలీలో ప్రతిపక్షాలను టార్గెట్ చేసిన ప్రధాని మోదీ
ప్రధాని నరేంద్ర మోదీ ప్రతిపక్షాలపై వ్యంగ్యాస్త్రాలు సంధిస్తూ, మహా వికాస్ అగాడీ నేతలు డ్రైవర్‌ సీటు కోసం పోట్లాడుకుంటున్నారని విమర్శించారు. మహారాష్ట్ర ఎన్నికలు సమీపిస్తుండటంతో, కూటమిలో ముఖ్యమంత్రి ఎవరు అవుతారనే విషయంలో అంతర్గత పోరు జరుగుతోందని వ్యాఖ్యానించారు. మహారాష్ట్ర అసెంబ్లీ ఎన్నికల ప్రచారంలో ధూలేలో జరిగిన సభలో మోదీ మాట్లాడుతూ, మహాయుతి అధికారంలో కొనసాగితేనే రాష్ట్రంలో వేగవంతమైన అభివృద్ధి సాధ్యమవుతుందని అన్నారు. అయితే, కొందరు మాత్రం ప్రజలను లూటీ చేసేందుకు రాజకీయాల్లో ఉన్నారంటూ, రాష్ట్ర అభివృద్ధికి ఆటంకాలు సృష్టిస్తున్నారని విమర్శించారు.
ఆర్టికల్ 370ని పునరుద్ధరించడానికి శాసనసభలో తీర్మానం
బీజేపీ నేతృత్వంలోని మహాయుతి మాత్రమే రాష్ట్రానికి సుపరిపాలన అందించగలదని ప్రధాని మోదీ విశ్వాసం వ్యక్తం చేశారు. మహారాష్ట్ర ప్రజలు తమకు ఏది అడిగినా హృదయపూర్వకంగా ఇస్తారని అన్నారు. కాంగ్రెస్‌ గిరిజన వర్గాలను విభజించడానికి ప్రయత్నిస్తోందని మండిపడ్డారు. వారంతా ఐక్యంగా ఉంటే, ఎవరు వారిని అడ్డుకోలేరని చెప్పారు. జమ్ముకశ్మీర్ అసెంబ్లీలో జరుగుతున్న పరిణామాలను ప్రస్తావిస్తూ, ఇండియా కూటమి అధికారంలోకి వచ్చి వెంటనే కశ్మీర్‌పై కుట్రలను ప్రారంభించిందని మోదీ అన్నారు. ఆర్టికల్ 370ని పునరుద్ధరించడానికి శాసనసభలో తీర్మానం ఆమోదించారని, అది ఎప్పటికీ జరగదని మోదీ స్పష్టంచేశారు.
