రాహుల్ గాంధీ టీమ్‌తో పొంగులేటి చర్చలు; కాంగ్రెస్‌లోకి వెళ్లడం కన్ఫమ్ అయినట్టేనా?
ఈ వార్తాకథనం ఏంటి
ఖమ్మం జిల్లా రాజకీయాల్లో కీలక నేతగా ఉన్న మాజీ ఎంపీ పొంగులేటి శ్రీనివాస్‌రెడ్డి బీఆర్ఎస్ నుంచి బయటకు వచ్చిన తర్వాత ఏ పార్టీలో చేరుతారు అనేది ఆసక్తికరంగా మారింది. అయితే ఉమ్మడి జిల్లాలో ఉన్న 10 నియోజకవర్గాల్లో పట్టున్న నేతగా పేరున్న పొంగులేటి శ్రీనివాస రెడ్డిని కాంగ్రెస్ తమ పార్టీలో చేరాలని కోరుతున్నట్లు కనిపిస్తోంది. అందులో భాగంగా రాహుల్ గాంధీ టీమ్ పొంగులేటిని సంప్రదించినట్లు సమాచారం. ఈ క్రమంలో పొంగులేటి కాంగ్రెస్‌లో చేరాలంటే కొన్ని షరతులు పెట్టినట్లు సమాచారం. పొంగులేటి శ్రీనివాస రెడ్డి ప్రధానంగా 10సీట్లను తన అనుచరులకే ఇవ్వాలని పట్టుబట్టినట్లు తెలుస్తోంది. అయితే పొంగులేటి ప్రపోజల్‌కు ఒక్కసారిగా ఖంగుతిన్న కాంగ్రెస్ నాయకులు, దీనికి ససేమిరా అంటున్నారు.
కాంగ్రెస్
కర్ణాటక ఎన్నికల తర్వాతే క్లారిటీ
రాహుల్ గాంధీ టీమ్ మాత్రం సీఎల్పీ లీడర్ భట్టి విక్రమార్క నియోజకవర్గమైన మధిర తప్పితే.. మిగతా స్థానాలపై ఆలోచిస్తామని అన్నట్లు సమాచారం. అలాగే సికింద్రాబాద్ కంటోన్మెంట్ స్థానాన్ని కూడా తన అనుచరుడికి ఇవ్వాలని పొంగులేటి పట్టుబట్టినట్లు ప్రచారం జరుగుతోంది. అయితే ఇది ఎంతవరకు నిజం అనేది తెలియాల్సి ఉంది. పొంగులేటి, రాహుల్ టీమ్ మధ్య తొలిదఫా చర్చలు దాదాపు 6గంటలు జరిగినట్లు సమాచారం. మరో దఫా చర్చలు జరిగిన తర్వాత పొంగులేటి కాంగ్రెస్‌లో చేరికపై క్లారిటీ వచ్చే అవకాశం ఉంది. అయితే కర్ణాటక అసెంబ్లీ ఎన్నికలు ముగిసిన తర్వాత, కాంగ్రెస్ అధిష్ఠానం తెలంగాణపై ఫోకస్ పెట్టే అవకాశం ఉంది. ఆ తర్వాతే పొంగులేటితో మరో దఫా చర్చలు జరిగే అవకాశం ఉంది.