AP High Court: పోసాని కృష్ణమురళికి హైకోర్టులో ఊరట.. ఆ కేసులలో కీలక ఆదేశాలు
ఈ వార్తాకథనం ఏంటి
వైఎస్‌ఆర్ కాంగ్రెస్ పార్టీ నేత,సినీ నటుడు పోసాని కృష్ణ మురళి (Posani Krishna Murali)కి ఆంధ్రప్రదేశ్ హైకోర్టులో (Andhra Pradesh High Court) కీలక ఊరట లభించింది.
సీఎం చంద్రబాబు నాయుడు, డిప్యూటీ సీఎం పవన్ కళ్యాణ్, మంత్రులు, వారి కుటుంబ సభ్యులపై అసభ్యకర వ్యాఖ్యలు చేయడం,సోషల్ మీడియాలో (Social Media) అభ్యంతరకర పోస్టులు పెట్టినట్టుగా వచ్చిన ఆరోపణల నేపథ్యంలో నాలుగు పోలీసు స్టేషన్లలో తనపై నమోదు చేసిన కేసులను రద్దు చేయాలని కోరుతూ పోసాని కృష్ణ మురళి మంగళవారం ఏపీ హైకోర్టులో క్వాష్ పిటిషన్ (Quash Petition) దాఖలు చేశారు.
ఈ పిటిషన్‌పై విచారణ చేపట్టిన ధర్మాసనం సంచలన వ్యాఖ్యలు చేసింది.
వివరాలు
17కి పైగా పోలీస్ స్టేషన్లలో కేసులు
విశాఖపట్టణం, చిత్తూరు జిల్లాల్లో నమోదైన కేసులపై తక్షణ చర్యలు తీసుకోవద్దని పోలీసులకు హైకోర్టు ఆదేశాలు జారీ చేసింది. తదుపరి విచారణను వచ్చే సోమవారానికి వాయిదా వేసింది.
అయితే,పోసాని కృష్ణ మురళిపై రాష్ట్రవ్యాప్తంగా 17కి పైగా పోలీస్ స్టేషన్లలో కేసులు నమోదయ్యాయి.
అన్నమయ్య జిల్లా ఓబులవారిపల్లె పోలీస్ స్టేషన్‌లో నమోదైన కేసుకు సంబంధించి ఫిబ్రవరి 26న పోలీసులు అతన్ని అరెస్ట్ చేశారు.
అనంతరం రైల్వే కొడూరు మేజిస్ట్రేట్ రిమాండ్ విధించడంతో రాజంపేట సబ్ జైలు (Rajampet Sub Jail)కి తరలించారు.
నరసరావుపేట పోలీస్ స్టేషన్‌లో నమోదైన మరో కేసు కారణంగా అక్కడి పోలీసులు రాజంపేట సబ్ జైలుకు చేరుకుని పీటీ వారెంట్‌ (PT Warrant)పై పోసానిని సోమవారం అదుపులోకి తీసుకున్నారు.
వివరాలు
కర్నూలు జిల్లాలో పోసానికి 14 రోజుల రిమాండ్
అదే రోజు సాయంత్రం నరసరావుపేట కోర్టులో అతన్ని హాజరుపరిచారు.
ఈ నేపథ్యంలో, పోసాని కృష్ణ మురళికి ఈ నెల 13 వరకు కోర్టు రిమాండ్ విధించింది.
తదనంతరం గుంటూరు సబ్ జైలుకు తరలించగా, మంగళవారం ఆదోని (Adoni) పోలీసులు గుంటూరు (Guntur) జైలులో నుంచి అతన్ని అదుపులోకి తీసుకుని కర్నూలు (Kurnool) తరలించారు.
అక్కడ కర్నూలు జిల్లా జడ్జి ఎదుట హాజరుపరచగా, న్యాయమూర్తి పోసానికి 14 రోజుల రిమాండ్ విధించారు. ప్రస్తుతం పోసాని కృష్ణ మురళి కర్నూలు జిల్లా జైలులో ఉన్నారు.