Surat: స్కెప్టిక్ ట్యాంక్‌లో ఊపిరాడక బీహార్‌కు చెందిన నలుగురు కార్మికులు మృతి
సూరత్‌లోని ఒక గ్రామంలో సెప్టిక్ ట్యాంక్ లోపల పనిచేస్తుండగా బిహార్‌కు చెందిన నలుగురు వలస కూలీలు ఊపిరాడక ప్రాణాలు కోల్పోయారని పోలీసులు బుధవారం తెలిపారు. ఈ ఘటన మంగళవారం సాయంత్రం పల్సానా-కటోదర రోడ్డులోని డైయింగ్ ఫ్యాక్టరీలో చోటుచేసుకుంది. సెప్టిక్ ట్యాంక్ క్లీనింగ్ ప్రక్రియలో ఇద్దరు కార్మికులు స్పృహ తప్పి పడిపోయారని, మరో ఇద్దరిని రక్షించేందుకు ప్రయత్నించారని ప్రాథమిక దర్యాప్తు సందర్భంగా ఓ పోలీసు అధికారి తెలిపారు. బీహార్‌కు చెందిన మృతులను గుర్తించే ప్రక్రియ ప్రస్తుతం కొనసాగుతోందని అధికారి తెలిపారు. ఫ్యాక్టరీ సీనియర్ అధికారులను విచారిస్తున్నట్లు బార్డోలీ డివిజన్ డిప్యూటీ సూపరింటెండెంట్ ఆఫ్ పోలీస్ (డీఎస్పీ) హెచ్ ఎల్ రాథోడ్ తెలిపారు.
చనిపోయిన నలుగురూ బీహార్‌ వాసులు: డీఎస్పీ
నలుగురు కార్మికులు సెప్టిక్ ట్యాంక్‌ను శుభ్రం చేసేందుకు వెళ్లి ఊపిరాడక మృతి చెందారు. తదుపరి విచారణ కొనసాగుతోంది. ఫ్యాక్టరీ సీనియర్లను ప్రశ్నిస్తున్నాం... చనిపోయిన నలుగురూ బీహార్‌ వాసులేనని డీఎస్పీ రాథోడ్ తెలిపారు. బుధవారం ఉదయం 6.30 గంటలకు ఫోన్ రావడంతో ఘటనా స్థలానికి చేరుకున్న పోలీసులు కూలీలు అపస్మారక స్థితిలో పడి ఉండడం గమనించారు. వారిని వెంటనే బయటకి తీసి ఆసుపత్రికి తరలించారు, అక్కడ వైద్యులు వారు చనిపోయినట్లు ప్రకటించారు. చనిపోయిన కార్మికులు ఫ్యాక్టరీ కాలనీలో నివసిస్తున్నారని పోలీసులు తెలిపారు. ఘటనకు సంబంధించి మరిన్ని వివరాలు తెలియాల్సి ఉంది.
