Maharashtra: స్కూళ్లలో హిందీని తప్పనిసరి చేస్తూ మహారాష్ట్ర ప్రభుత్వ జీవో.. తీవ్ర అభ్యంతరం వ్యక్తం చేసిన ప్రతిపక్ష కూటమి
ఈ వార్తాకథనం ఏంటి
మహారాష్ట్రలో ని దేవేంద్ర ఫడణవీస్ ప్రభుత్వం ఒక కీలక నిర్ణయం తీసుకుంది.
ఈ నిర్ణయానికి అనుగుణంగా,మొదటి తరగతి నుండి ఐదవ తరగతి వరకు హిందీ భాషను తప్పనిసరి చేస్తూ అధికారిక జీవో (G.O) జారీ చేసింది.
జాతీయ విద్యా విధానం (NEP)లో పేర్కొన్న త్రిభాషా సూత్రాన్ని అమలు చేయాలనే ఉద్దేశంతో రాష్ట్ర ప్రభుత్వం తాజా పాఠ్యపుస్తకాలను హిందీ తప్పనిసరిగా ఉండేలా ముద్రిస్తోంది.
అయితే ఈ నిర్ణయానికి వ్యతిరేకంగా రాజకీయ ప్రతిపక్షాలు గళం విప్పాయి.ముఖ్యంగా మాజీ ముఖ్యమంత్రి, శివసేన (యూబీటీ) అధినేత ఉద్ధవ్ థాక్రే తీవ్ర అభ్యంతరం వ్యక్తం చేశారు.
చిన్న పిల్లలపై హిందీని బలవంతంగా రుద్దడాన్ని తాము ఏమాత్రం సహించబోమని ఆయన స్పష్టం చేశారు.
వివరాలు
హిందీ భాష ఐచ్ఛికంగా ఉంటే ఎటువంటి సమస్య ఉండదు
తమ పార్టీకి హిందీ భాషపై ఎటువంటి వ్యతిరేకత లేదని చెప్పిన ఆయన, కానీ పిల్లలపై ఈ విధంగా ఒత్తిడి అవసరమా? అంటూ ప్రశ్నించారు.
ప్రస్తుతం చిన్నారులు మరాఠీ, ఇంగ్లీష్ భాషల్లో విద్యనభ్యసిస్తుండగా, మూడో భాషగా హిందీని బలవంతంగా నేర్పించాల్సిన అవసరం ఏమిటని ఉద్ధవ్ నిలదీశారు.
కేవలం థాక్రేనే కాకుండా కాంగ్రెస్ నేత విజయ్ వాడేట్టివార్ కూడా ఈ నిర్ణయాన్ని తప్పుపట్టారు.
హిందీ భాష ఐచ్ఛికంగా ఉంటే ఎటువంటి సమస్య ఉండదని,కానీ తప్పనిసరి చేస్తే మాత్రం రాష్ట్ర ప్రజల భావోద్వేగాలకు ఎట్టిపరిస్థితుల్లోనూ తీరని నష్టం కలుగుతుందన్నారు.
రాష్ట్ర ప్రభుత్వం తీసుకున్న నిర్ణయాన్ని అనుసరిస్తూ వచ్చే విద్యాసంవత్సరం నుంచే మూడవ భాషగా హిందీని కొత్త పాఠ్యాంశాల్లో చేర్చనున్నారు.
వివరాలు
తమిళనాడు హిందీ భాషపై గట్టి వ్యతిరేకత
ఇక ఇదే తరహాలో తమిళనాడులో అధికారంలో ఉన్న డీఎంకే ప్రభుత్వం హిందీ భాషకు గట్టి వ్యతిరేకతను ప్రకటించింది.
తాము త్రిభాషా సూత్రాన్ని ఏ మాత్రం అంగీకరించబోమని, కేవలం ద్విభాషా విధానానికే మద్దతు ఇస్తామని ముఖ్యమంత్రి స్టాలిన్ స్పష్టం చేశారు.
ఈ అంశంపై తమిళనాడులో ఇప్పటికే డీఎంకే, బీజేపీ మధ్య మాటల యుద్ధం జరుగుతోంది.
ఇప్పుడు ఇదే సమస్య మహారాష్ట్రకు చేరింది. ఇక్కడ కూడా ప్రతిపక్షాలు ప్రభుత్వ నిర్ణయాన్ని తీవ్రంగా వ్యతిరేకిస్తున్నాయి.
ఈ క్రమంలో మహారాష్ట్రలో వచ్చే రోజుల్లో రాజకీయంగా ఇంకా ఎలాంటి పరిణామాలు చోటు చేసుకుంటాయో చూడాల్సి ఉంది.