Akashteer: దాయాది పాక్ కి దడ పుట్టించిన 'ఆకాష్‌టీర్'.. దీని ప్రత్యేకతలు ఇవే..
ఈ వార్తాకథనం ఏంటి
ప్రస్తుతం ప్రపంచ వ్యాప్తంగా అత్యధికంగా ప్రస్తావించబడుతోన్న పేరు "ఆకాష్‌టీర్".
ఇది పాకిస్థాన్‌పై భారత్ చేపట్టిన ఆపరేషన్ సిందూర్ సమయంలో ఉపయోగించిన అత్యంత శక్తివంతమైన ఆయుధ వ్యవస్థగా గుర్తింపు పొందింది.
ఈ వ్యూహాత్మక ఆయుధ వ్యవస్థ శత్రుదేశానికి భయానక సంకేతంగా మారింది.
ఆకాష్‌టీర్ కారణంగా పాకిస్థాన్‌లో కలవరము మొదలైంది. అంతేకాకుండా, అంతర్జాతీయ రక్షణ నిపుణులకూ ఆందోళన కలిగించే స్థాయిలో ఇది ప్రభావం చూపింది.
శత్రువుపై ఆకాష్‌టీర్ చూపిన వేగం, సామర్థ్యం కారణంగా ఇది ప్రపంచవ్యాప్తంగా చర్చనీయాంశంగా మారింది.
వివరాలు
ఆకాష్‌టీర్ - భారత స్వదేశీ టెక్నాలజీతో అభివృద్ధి చేసిన ఆధునిక రక్షణ వ్యవస్థ
ఆకాష్‌టీర్ అనేది ఆర్టిఫిషియల్ ఇంటెలిజెన్స్ ఆధారంగా భారతదేశంలోనే రూపొందించబడిన శక్తివంతమైన ఎయిర్ డిఫెన్స్ వ్యవస్థ.
భారత్ ఎలక్ట్రానిక్స్ లిమిటెడ్ (BEL) దీన్ని అభివృద్ధి చేసింది. ఇది "ఇండియన్ ఎయిర్ డిఫెన్స్ కంట్రోల్ అండ్ రిపోర్టింగ్ సిస్టమ్"గా వ్యవహరిస్తోంది.
భారత సైన్యంలో భాగమైన ఆర్మీ ఎయిర్ డిఫెన్స్ యూనిట్లను వ్యూహాత్మకంగా సమన్వయం చేయడం, కమాండ్, కంట్రోల్ వ్యవస్థలతో సమర్థవంతంగా అమర్చడం దీని లక్ష్యం.
యుద్ధ భూముల్లో తక్కువ ఎత్తున గగనతలాన్ని నిరంతరం పర్యవేక్షించడం, భూమి ఆధారిత ఎయిర్ డిఫెన్స్ ఆయుధాలను సమర్థంగా నియంత్రించడం ఆకాష్‌టీర్ ప్రధాన విధి.
వివరాలు
ఆపరేషన్ సిందూర్ సమయంలో ఆకాష్‌టీర్ అసాధారణ ప్రతిభ
ఇటీవల భారతదేశం చేపట్టిన ఆపరేషన్ సిందూర్‌కు ప్రతీకారంగా పాకిస్థాన్ పలు డ్రోన్లు, క్షిపణులతో దాడులకు యత్నించింది.
అయితే ఆకాష్‌టీర్ ఈ దాడులను సమర్థవంతంగా తిప్పికొట్టింది. ఆకాష్‌టీర్ అత్యుత్తమంగా స్పందించడంతో భారత భూభాగంలో ఎటువంటి నష్టం జరగలేదు.
ఇది పాకిస్థాన్ ప్రయోగించిన డ్రోన్లు, క్షిపణులను సమర్థంగా నిరోధించగలిగింది. ఈ కారణంగానే ప్రపంచ నిపుణులు దీనిపై గంభీరంగా చర్చ చేస్తున్నారు.