ఉత్తర్‌ప్రదేశ్‌: కోడల్ని లైంగికంగా వేధిస్తున్నాడని భర్తను హత్య చేసిన భార్య
కోడల్ని లైంగికంగా వేధిస్తున్నాడని భర్తను, భార్య ఘోరంగా హత్య చేసిన ఘటన ఆలస్యంగా వెలుగు చూసింది. ఈ ఘటన ఉత్తర్‌ప్రదేశ్‌లో జరిగింది. బదౌన్‌కు చెందిన తేజేంద్ర సింగ్‌, భార్య మిథిలేశ్‌ దేవికి నలుగురు సంతానం. 43ఏళ్ల తేజేంద్ర సింగ్‌ ఆగస్ట్ 14న అనుమానాస్పద స్థితిలో ప్రాణాలు కోల్పోయాడు. ఈ మేరకు కేసు నమోదు చేసుకున్న పోలీసులు కుటుంబ సభ్యులను విచారించారు. తన భర్తను ఎవరో గుర్తుతెలియని వ్యక్తులు హత్య చేసినట్లుగా భార్య సైతం వాంగ్మూలం ఇచ్చారు. ఈ క్రమంలోనే మిథిలేశ్‌ దేవి సమాధానాలు చెప్పడంలో తడబడినట్లు, పొంతని లేని విషయాలు చెప్పారని పోలీసులు గుర్తించారు. అనుమానంతో ఆమెను కస్టడీలోకి తీసుకుని తమదైన శైలిలో విచారించారు. దీంతో ఆమె నేరం ఒప్పుకున్నారు.
కోడల్ని లైంగికంగా సహకరించేందుకు ఒప్పించమని బలవంతం పెట్టేవాడు : మిథిలేశ్‌ దేవి
తన భర్త తరచుగా తనను కొట్టేవాడని, కోడల్ని లైంగికంగా సహకరించేందుకు ఒప్పించమని వేధించేవాడని నిందితురాలు మిథిలేశ్‌ దేవి చెప్పారు. భర్త విపరీత ప్రవర్తనతో విసిగిపోయి, అతడ్ని వదిలించుకునేందుకు అవకాశాల కోసం ఎదురుచూశానని తెలిపారు. ఈ క్రమంలోనే ఆగస్ట్ 14న విపరీతమైన మద్యం తాగి వచ్చి గొడవ చేశాడన్నారు. ఇదే సమయంలో ఇంటి బయట నిద్రిస్తున్నాడని, దీంతో కొడవలితో గొంతు కోసి హత్య చేసినట్లు మిథిలేశ్‌ దేవి వివరించారు. అయితే తన కోడల్ని లైంగిక వేధింపుల నుంచి రక్షించేందుకే భర్తను చంపాల్సి వచ్చిందన్నారు. ఈ మేరకు కేసు నమోదు చేసుకున్న పోలీసులు ఆమెను అరెస్ట్ చేశారు.
