Karnataka: 'అవును, చాలామంది డీకే సీఎం కావాలని కోరుకుంటున్నారు..': ఎమ్మెల్యే యోగేశ్వర్
ఈ వార్తాకథనం ఏంటి
కర్ణాటకలో ముఖ్యమంత్రి పీఠం మార్పు అంశం చుట్టూ తీవ్ర చర్చలు కొనసాగుతున్నప్పటికీ, ప్రస్తుతం సీఎం సిద్ధరామయ్య మాత్రం ఎలాంటి మార్పూ ఉండదని, తానే పదవిలో కొనసాగుతానని స్పష్టంగా చెప్పారు. అయినా నాయకత్వ మార్పుపై వాదనలు ఆగట్లేదు. ఇటీవలి కాలంలో పలువురు ఎమ్మెల్యేలు బహిరంగంగానే సీఎం మారాలని కోరుతూ ప్రస్తుత రాజకీయాలపై సంచలన వ్యాఖ్యలు చేస్తున్నారు. ముఖ్యంగా కాంగ్రెస్ పార్టీకి చెందిన మరికొంత మంది నేతలు డిప్యూటీ సీఎం డీకే శివకుమార్‌కు ఎక్కువ మంది ఎమ్మెల్యేలు మద్దతుగా ఉన్నారని స్పష్టం చేశారు.
వివరాలు
డీకే శివకుమార్‌కు మద్దతుగా 100 మంది కాంగ్రెస్ ఎమ్మెల్యేలు
ఈ క్రమంలో ఎమ్మెల్యే సీపీ యోగేశ్వర్ మీడియాతో మాట్లాడుతూ.. ''అవును, అనేక మంది ఎమ్మెల్యేలు డీకే శివకుమార్‌ను ముఖ్యమంత్రి పదవిలో చూడాలని ఆకాంక్షిస్తున్నారు. ఈ విషయంలో ఎలాంటి అభిప్రాయ భేదాలు లేవు. ప్రజలు,పార్టీ ఎమ్మెల్యేలు కూడా ఇదే కోరుకుంటున్నారు. అయితే ఈ అంశంపై తుది నిర్ణయం మాత్రం కాంగ్రెస్ కేంద్ర నాయకత్వానికి మాత్రమే సంబంధించినది'' అని చెప్పారు. ఇదిలా ఉంటే, డీకే శివకుమార్‌కి అత్యంత సన్నిహితుడిగా పేరొందిన ఎమ్మెల్యే ఇక్బాల్ హుస్సేన్ ఇటీవలే కీలక వ్యాఖ్యలు చేశారు. ఆయన ప్రకారం దాదాపు 100 మంది కాంగ్రెస్ ఎమ్మెల్యేలు డీకే శివకుమార్‌కు మద్దతుగా ఉన్నారని తెలిపారు.
వివరాలు
నాకు వేరే గత్యంతరం లేదు..
కర్ణాటకలో నాయకత్వ మార్పు జరుగదని సీఎం సిద్ధరామయ్య ప్రకటించిన తరవాత ఉప ముఖ్యమంత్రి డీకే శివకుమార్ మాత్రం తన స్థితి గురించి భావోద్వేగంగా స్పందించారు. ''నాకు వేరే ఎలాంటి ప్రత్యామ్నాయమూ లేదు. ముఖ్యమంత్రి పక్కన ఉండక తప్పదు. ఆయనకు మద్దతు ఇవ్వడం తప్పనిసరి. అధిష్టానం ఏ నిర్ణయం తీసుకున్నా దాన్ని నేను పాటించాల్సిందే'' అని డీకే శివకుమార్ బుధవారం జరిగిన విలేకరుల సమావేశంలో చెప్పారు. ఈ మాటలు ఆయన సిద్ధరామయ్య సమక్షంలోనే చెప్పడం గమనార్హం. దీంతో ఆ వ్యాఖ్యలు రాజకీయంగా కీలక చర్చనీయాంశంగా మారాయి.