International Yoga Day 2025:యోగా అనే పదానికి మూలం ఏమిటి?దీన్ని ఎవరెవరు ప్రారంభించారు?అంతర్జాతీయ యోగా దినోత్సవాన్ని జూన్ 21న ఎందుకు జరుపుకుంటారు?
ఈ వార్తాకథనం ఏంటి
ప్రతి సంవత్సరం జూన్ 21న అంతర్జాతీయ యోగా దినోత్సవాన్ని నిర్వహించడం ఆనవాయితీగా మారింది. ఈ తేదీని ఎంచుకోవడానికి ప్రత్యేకమైన కారణముంది. ఉత్తరార్థగోళంలో ఈ రోజు సంవత్సరం మొత్తం మీద అత్యధికంగా పగటి సమయం ఉండే రోజు. దీని వలన ప్రకృతి శక్తులు శ్రేష్ఠంగా పనిచేస్తాయి అని విశ్వసిస్తారు. ఇదే కారణంగా 2015లో మొదలైన తర్వాత ప్రతి ఏడూ జూన్ 21ను యోగా డేగా గౌరవిస్తున్నారు. యోగా అంటే శారీరకమైన,మానసికమైన నియంత్రణ ద్వారా చిత్తాన్ని భగవంతుని వైపు నిలిపి ఉంచడం. అంటే, శరీర ఇంద్రియాలను అదుపులో పెట్టి, మనసును ఏకాగ్రపరచడం ద్వారా పరమాత్మను చేరడం. 'యోగ' అనే పదానికి అర్థం 'సాధన' అని చెప్పవచ్చు. యోగాలో ఎన్నో రకాల ఆసనాలు, సాధనాపద్ధతులు ఉన్నాయి.
వివరాలు
2025 అంతర్జాతీయ యోగా దినోత్సవ థీమ్
వీటన్నింటినీ అనుసరిస్తున్నప్పుడు ప్రధానంగా దృష్టి పెట్టేది శ్వాసపై. శ్వాస నియంత్రణతో శరీరంలోని గాలిచలనం సమతుల్యంగా మారుతుంది. దీనివల్ల శ్వాస సంబంధిత సమస్యలు తగ్గుతాయి. హార్మోన్ల స్రావం సమన్వయంగా జరిగి, శరీరంతో పాటు మనస్సు కూడా ప్రశాంతంగా మారుతుంది. దీన్ని పాటించడం వల్ల అనేక మానసిక రుగ్మతలు కూడా దూరమవుతాయి. 2025వ సంవత్సరానికి అంతర్జాతీయ యోగా దినోత్సవ థీమ్.. "యోగాతో సమగ్ర ఆరోగ్యాన్ని ప్రపంచానికి అందించడం". యోగాను విశ్వవ్యాప్తంగా ఆరోగ్య పరిరక్షణ సాధనంగా ప్రజల్లో మక్కువ పెంపొందించాలానే లక్ష్యంతో ఈ థీమ్‌ను ఎంచుకున్నారు.
వివరాలు
చరిత్ర
యోగా పుట్టింది భారతదేశంలోనే. మన సంస్కృతికే ఇది భాగం. 2014 సెప్టెంబరులో భారత ప్రధానమంత్రి నరేంద్ర మోదీ, ఐక్యరాజ్య సమితి (UNGA) జనరల్ అసెంబ్లీలో ప్రసంగిస్తూ యోగాను అంతర్జాతీయ స్థాయిలో జరుపుకోవాలని ప్రతిపాదించారు. యోగా అనేది భారతీయ ప్రాచీన సంప్రదాయాన్ని ప్రతిబింబించే గొప్ప ఆధ్యాత్మిక పరిచయం అని చెప్పారు. ఇది శరీరం, మనస్సు, ఆలోచనలు, క్రియల మధ్య ఏకత్వాన్ని కలిగించడమే లక్ష్యంగా ఉంచుతుంది. యోగా అనేది కేవలం వ్యాయామంగా కాకుండా, సంపూర్ణ జీవన విధానంగా పనిచేస్తుందని ఆయన స్పష్టంగా వివరించారు. ఈ ప్రతిపాదనకు ప్రపంచవ్యాప్తంగా 175 దేశాలు మద్దతు తెలిపాయి. అప్పటి నుంచే ప్రతి సంవత్సరం జూన్ 21న ప్రపంచ యోగా దినోత్సవాన్ని అధికారికంగా నిర్వహిస్తున్నారు.
వివరాలు
ప్రాముఖ్యత
యోగా అనేది కేవలం శారీరక సాధనమే కాకుండా, మానసిక ప్రశాంతతను కూడా అందిస్తుంది. యోగాను రోజువారీ జీవనశైలిలో భాగంగా చేస్తే శారీరక ఆరోగ్యం మెరుగవుతుంది. యోగాలోనూ అసలు లక్ష్యం ఫిట్‌నెస్ కాకపోయినా, ఇప్పటికీ దానివల్ల వచ్చే ప్రయోజనాలను చూసి ఆరోగ్య సాధనంగా కూడా అందరూ స్వీకరిస్తున్నారు. ప్రారంభంలో యోగాలో ఫిట్‌నెస్ కన్నా మానసిక నిర్మలత, ఆధ్యాత్మిక శక్తిని పెంపొందించడం ప్రధాన లక్ష్యంగా ఉండేది. కానీ, కాలక్రమంలో యోగాలో శారీరక దృక్పథం కూడా కలగడంతో ఇది ప్రజల దైనందిన జీవితంలో భాగమవుతోంది.
వివరాలు
'యోగా' అంటే అర్థం ఏమిటీ? దీనికి మూలం ఎవరు?
'యోగ' అనే పదం సంస్కృత భాష నుంచి వచ్చింది. మౌలికంగా ఇది 'యుజ్'అనే పదం నుంచి ఉద్భవించింది. 'యుజ్' అంటే 'ఒకటిగా కలిపించడం' లేదా 'ఏకం చేయడం'. అంటే శరీరాన్ని,మనస్సును,శ్వాసను, ఆలోచనలను ఒకే దారిలో మలచడం.ఈ మాట ద్వారా మనం భావించవలసింది.. యోగా అనేది మన ఆరోగ్యాన్ని,మానసిక ప్రశాంతతను కలిగించే సమగ్ర సాధన పద్ధతి. యోగాను సాక్షాత్తు ఆ ఆదియోగి (శివుడు)ప్రారంభించారని, పురాణాల్లోనూ ప్రస్తావన ఉంది. అందుకే యోగాకు అంత శ్రేష్ఠత ఉంది. బరువులు ఎత్తాల్సిన అవసరం లేదు, పరుగులు పెట్టాల్సిన అవసరం లేదు. సులభమైన ఆసనాలు, శ్వాసపద్ధతులతో ఆరోగ్యాన్ని మెరుగుపరచడం సాధ్యం. ఈ యోగా దినోత్సవం సందర్భంగా మీరు కూడా యోగాను ప్రారంభించండి. ఆరోగ్యంగా ఉండటానికి ఇది గొప్ప ప్రారంభం అవుతుంది.