Economically stable countries in world: ఆర్థిక స్థిరత్వ దేశాల జాబితాలో యూఏఈకి అగ్రస్థానం.. భారత్ స్థానం ఎంతంటే?
ఈ వార్తాకథనం ఏంటి
ప్రపంచంలో ఆర్థికంగా బలంగా, స్థిరంగా ఉన్న దేశాల తాజా జాబితాను విడుదల చేశారు. 2026 సంవత్సరానికి సంబంధించి యూఎస్ న్యూస్ అండ్ వరల్డ్ రిపోర్ట్ ప్రకటించిన ఈ ర్యాంకింగ్స్లో యునైటెడ్ అరబ్ ఎమిరేట్స్ తొలి స్థానాన్ని దక్కించుకుని ప్రపంచ దృష్టిని ఆకర్షించింది. ప్రపంచంలోనే అతిపెద్ద ఆర్థిక వ్యవస్థగా గుర్తింపు పొందిన అమెరికా మాత్రం తొలి పది దేశాల్లో చోటు సంపాదించలేకపోవడం చర్చనీయాంశమైంది. భారత్ ఈ జాబితాలో 47వ స్థానంలో నిలిచింది. ఆర్థిక స్థిరత్వం అనేది కేవలం సంపదతో మాత్రమే నిర్ణయించబడదు. తక్కువ అప్పులు, బలమైన ఆర్థిక వ్యవస్థ, యుద్ధాలు, మహమ్మారులు, ఆర్థిక మాంద్యాలు వంటి సంక్షోభాలను ఎదుర్కొనే సామర్థ్యం ఉన్న దేశాలను ఆర్థికంగా స్థిరమైన దేశాలుగా పరిగణిస్తారు.
వివరాలు
13వ స్థానంలో అమెరికా
అలాంటి దేశాల్లో మెరుగైన రవాణా సదుపాయాలు, ఆధునిక మౌలిక వసతులు, విశ్వసనీయ డిజిటల్ లావాదేవీ వ్యవస్థలు ఉండటం వల్ల ప్రజల జీవన ప్రమాణాలు మెరుగుపడటంతో పాటు పర్యాటకులకు కూడా అనుకూల వాతావరణం ఏర్పడుతుంది. ఈ జాబితాలో 504 బిలియన్ డాలర్ల స్థూల దేశీయోత్పత్తితో యూఏఈ మొదటి స్థానంలో నిలవగా, తర్వాతి స్థానాల్లో స్విట్జర్లాండ్, జర్మనీ, కెనడా, జపాన్ ఉన్నాయి. అలాగే ఆస్ట్రేలియా, స్వీడన్, డెన్మార్క్, నెదర్లాండ్స్, సౌదీ అరేబియా దేశాలు తొలి పది స్థానాల్లో చోటు సంపాదించాయి. అమెరికా మాత్రం 13వ స్థానానికి పరిమితమైంది.
వివరాలు
భారత్, ఆర్థిక స్థిరత్వం విషయంలో 47వ స్థానం
భారత్కు పొరుగు దేశమైన పాకిస్థాన్ ఈ జాబితాలో స్థానం దక్కించుకోలేకపోయింది. మరోవైపు, 4.15 ట్రిలియన్ డాలర్ల ఆర్థిక పరిమాణంతో వేగంగా అభివృద్ధి చెందుతున్న దేశంగా గుర్తింపు పొందుతున్న భారత్, ఆర్థిక స్థిరత్వం విషయంలో మాత్రం 47వ స్థానంలో నిలిచింది. ఈ ర్యాంకింగ్స్ ప్రపంచ ఆర్థిక పరిస్థితులను అంచనా వేసే విశ్లేషకులకు, విదేశీ పెట్టుబడిదారులకు, పర్యాటక రంగానికి కీలక సూచికగా ఉపయోగపడుతున్నాయి.