Axar Patel: తండ్రి కాబోతున్న టీమిండియా ఆల్ రౌండర్.. సోషల్ మీడియా వేదికగా ప్రకటన
ఈ వార్తాకథనం ఏంటి
టీమిండియా ఆల్ రౌండర్ అక్షర్ పటేల్ తన అభిమానులకు గుడ్‌న్యూస్ అందించాడు. తన భార్య మేహా పటేల్ ప్రెగ్నెన్సీ వార్తను సోషల్ మీడియాలో వెల్లడిస్తూ, వారు తమ తొలి బిడ్డకు స్వాగతం పలుకబోతున్నారని తెలిపారు. ఈ సందర్భంగా అక్షర్ పటేల్ ఓ అరుదైన వీడియోను కూడా పంచుకున్నారు, ఇందులో ఆ జంట ఎంతో ఆనందంగా కనిపించారు. మేహా పటేల్, ఒక డైటిషియన్, న్యూట్రిషియన్, అక్షర్‌తో 2023 జనవరిలో వివాహ బంధంతో ఒక్కటయ్యారు. వడోదరలో జరిగిన ఈ వేడుకలో పలువురు భారత క్రీడాకారులు పాల్గొన్నారు. మేహా పటేల్ సోషల్ మీడియాలో యాక్టివ్‌గా ఉంటూ, తరచూ ఆహార ప్లాన్‌లను పంచుకుంటున్నారు.
వివరాలు
ఆస్ట్రేలియా పర్యటన నేపథ్యంలో విశ్రాంతి
అక్షర్ పటేల్ ఇటీవల ది గ్రేట్ ఇండియన్ కపిల్ షోలో పాల్గొని, ప్రెగ్నెన్సీ గురించి కొంత హింట్ ఇచ్చారు. "త్వరలో ఆసక్తికరమైన వార్త రాబోతుంది" అని ఆయన చెప్పారు. దీంతో అందరూ అతడి ప్రకటన కోసం ఆసక్తిగా ఎదురుచూశారు. తాజాగా ఆ సస్పెన్స్‌కు తెర దించిన ఆయన గుడ్‌న్యూస్ ప్రకటించారు. అక్షర్ పటేల్ ఇటీవల బంగ్లాదేశ్‌తో 2 మ్యాచుల టెస్టు సిరీస్‌కు ఎంపికయ్యాడు, అయితే ఒక్క మ్యాచ్‌లో కూడా తుది జట్టులో చోటు దక్కించుకోలేదు. త్వరలో జరిగే న్యూజిలాండ్ టెస్టు సిరీస్, ఆస్ట్రేలియా పర్యటన నేపథ్యంలో బీసీసీఐ అతడికి విశ్రాంతి నిచ్చింది, దీంతో అతడు తన ఖాళీ సమయాన్ని కుటుంబంతో గడుపుతున్నాడు.
వివరాలు
భారత జట్టులో కీలక ప్లేయర్‌
అక్షర్ పటేల్ భారత జట్టులో కీలక ప్లేయర్‌గా కొనసాగుతున్నాడు. 2024లో జరిగిన టీ20 ప్రపంచకప్‌లో భారత్ విజేతగా నిలవడంలో ఆయన కీలక పాత్ర పోషించాడు. సెమీ ఫైనల్‌లో ఇంగ్లాండ్‌తో జరిగిన మ్యాచ్‌లో అక్షర్ అద్భుత ప్రదర్శనతో తన ప్రతిభ చూపించాడు. జట్టు 34/3తో ఉన్నప్పుడు క్రీజులోకి వచ్చిన అక్షర్, విరాట్ కోహ్లీతో కలిసి కీలక భాగస్వామ్యం నెలకొల్పి 31 బంతుల్లో 47 రన్స్ చేశారు, దీంతో భారత జట్టు నిర్ణీత 20 ఓవర్లలో 171/7 పరుగులు చేసింది. తదుపరి బౌలింగ్‌లో 4 ఓవర్లు వేసి 23 పరుగులు ఇచ్చి 3 వికెట్లు తీశాడు. ఆ తర్వాత, దక్షిణాఫ్రికాతో జరిగిన ఫైనల్‌లో భారత్ గెలిచి, 17 ఏళ్ల తర్వాత టీ20 ప్రపంచకప్ టైటిల్‌ను సాధించింది.