Mohammed Siraj Test Selection: సిరాజ్కు చోటు దక్కకపోవడంపై కాంగ్రెస్ సంచలన వ్యాఖ్యలు
ఈ వార్తాకథనం ఏంటి
న్యూజిలాండ్తో తొలి టెస్టు కోసం టీమిండియా తుది జట్టు ఎంపిక ఇప్పుడు రాజకీయ వివాదానికి దారితీసింది. హైదరాబాద్కు చెందిన పేసర్ మహమ్మద్ సిరాజ్కు ప్లేయింగ్ ఎలెవన్లో చోటు కల్పించకపోవడంపై కాంగ్రెస్, బీజేపీ నేతల మధ్య మాటల యుద్ధం మొదలైంది. సిరాజ్కు మంచి రికార్డు ఉన్నప్పటికీ అతడిని పక్కన పెట్టడం వెనుక మతపరమైన వివక్ష ఉందనే అనుమానాన్ని కాంగ్రెస్ ఎంపీ ఇమ్రాన్ మసూద్ వ్యక్తం చేశారు. 'అతడి పేరు సిరాజ్.. అది ఒక్కటే కారణమా?' అంటూ ప్రశ్నించారు. మంచి ప్రదర్శన ఉన్నా అవకాశం ఇవ్వకపోవడం వివక్షకు నిదర్శనమని ఆయన వ్యాఖ్యానించారు.
Details
క్రికెట్లో మతాన్ని తీసుకొస్తున్నారంటూ బీజేపీ ఎదురుదాడి
కాంగ్రెస్ ఆరోపణలపై బీజేపీ తీవ్రంగా స్పందించింది. క్రికెట్ను మతపరమైన కోణంలోకి లాగుతూ ఓటు బ్యాంకు రాజకీయాలు చేస్తున్నారని విమర్శించింది.
బీజేపీ అధికార ప్రతినిధి ప్రదీప్ భండారీ సిరాజ్తో పాటు ఆల్రౌండర్ రవీంద్ర జడేజాకు కూడా తుది జట్టులో చోటు దక్కలేదని గుర్తుచేశారు.
భారత జట్టు తరఫున ఆడే ప్రతి క్రికెటర్ దేశ జెర్సీని ధరిస్తాడని,ఆటను రాజకీయాల కోసం విభజించవద్దని హితవు పలికారు. దీంతో జట్టు ఎంపికపై మొదలైన చర్చ రాజకీయ రంగు పులుముకుంది.
Details
సిరాజ్కు మద్దతుగా రవిశాస్త్రి.. జట్టు మేనేజ్మెంట్ వివరణ
మరోవైపు సిరాజ్ను పక్కన పెట్టడంపై మాజీ కోచ్ రవిశాస్త్రి కూడా ప్రశ్నలు లేవనెత్తారు.
గంటకు 140 కిలోమీటర్ల వేగంతో బౌలింగ్ చేయగల సామర్థ్యం, అనుభవం, దూకుడు, వికెట్లు తీసే నైపుణ్యం సిరాజ్కు ఉన్నాయని గుర్తుచేశారు.
అయితే జట్టు మేనేజ్మెంట్ మాత్రం ఇది వ్యూహాత్మక నిర్ణయమని స్పష్టం చేసింది. కెప్టెన్, కోచింగ్ బృందం అందుబాటులో ఉన్న ఆటగాళ్లలో అత్యుత్తమ కలయికగా భావించిన జట్టునే ఎంపిక చేసిందని బ్యాటింగ్ కోచ్ సితాన్షు కోటక్ తెలిపారు.
సిరాజ్ ఫిట్నెస్ లేదా సామర్థ్యంలో ఎలాంటి సమస్య లేదని కూడా ఆయన స్పష్టం చేశారు.