Trump: 'అమెరికాకు సమర్థులైన వ్యక్తులు రావడం నాకు ఇష్టం': హెచ్1బీ వీసా చర్చపై డొనాల్డ్ ట్రంప్
ఈ వార్తాకథనం ఏంటి
హెచ్1బీ (H1B Visa) వీసాల విస్తరణపై డొనాల్డ్ ట్రంప్ (Donald Trump) పార్టీలో భిన్నాభిప్రాయాలు వ్యక్తమవుతున్నాయి. ప్రపంచ కుబేరుడు, టెస్లా సీఈఓ ఎలాన్ మస్క్, భారతీయ అమెరికన్ వ్యాపారవేత్త వివేక్ రామస్వామి చట్టబద్ధమైన వలసలకు మద్దతు ఇస్తున్నారు. అయితే, ఇతర నేతలు మాత్రం అమెరికా ఫస్ట్ విధానానికి కట్టుబడి ఉన్నారు. ఈ నేపథ్యంలో తాజాగా అమెరికా మాజీ అధ్యక్షుడు డొనాల్డ్ ట్రంప్ స్పందించారు. ఆయనకు రెండు వైపుల వాదనలూ నచ్చాయని, కానీ సమర్థవంతమైన వ్యక్తులు అమెరికాలోకి రావాలని తాను కోరుకుంటున్నట్లు తెలిపారు.
వివరాలు
అన్ని రంగాల వ్యక్తులపై నా అభిప్రాయం: ట్రంప్
వైట్‌హౌస్‌లో విలేకరులు అడిగిన ప్రశ్నకు ట్రంప్ సమాధానమిస్తూ, ''ఈ అంశంపై రెండు వైపుల వాదనలూ నాకు నచ్చాయి. సమర్థవంతులైన వ్యక్తులు అమెరికాకు రావడం నాకు ఇష్టమే. ఇది కేవలం ఇంజనీర్ల గురించి మాత్రమే కాదు, అన్ని రంగాల వ్యక్తులపై నా అభిప్రాయం. మన దేశ వ్యాపారాలు విస్తరించేందుకు నైపుణ్యం కలిగిన వ్యక్తుల అవసరం ఉంది. హెచ్1బీ వీసా దీన్ని సాధించగలదు. అందుకే నేను రెండు వైపుల్నీ సమర్థిస్తున్నాను,'' అని పేర్కొన్నారు.
వివరాలు
ఆర్హత కలిగిన సాంకేతిక నిపుణులు అమెరికాకు రావడం ప్రయోజనం
ఆర్హత కలిగిన సాంకేతిక నిపుణులు అమెరికాకు రావడం ద్వారా ప్రయోజనం ఉందని ఎలాన్ మస్క్, వివేక్ రామస్వామి పేర్కొన్నారు. అయితే రిపబ్లికన్ పార్టీకి చెందిన నిక్కీ హేలీ భిన్నమైన అభిప్రాయాన్ని వ్యక్తం చేశారు. ''నేను సౌత్ కరోలినా గవర్నర్‌గా ఉన్న సమయంలో నిరుద్యోగిత రేటు 11 శాతం నుంచి 4 శాతానికి తగ్గింది. మేము విదేశీ ఉద్యోగులను కాకుండా పెట్టుబడులను ఆహ్వానించాం, అందువల్లనే అది సాధ్యమైంది. ప్రజలకు కొత్త ఉద్యోగాల శిక్షణ ఇచ్చి, వారిని విమానాలు, ఆటోమొబైల్స్ తయారీలో నిపుణులుగా మార్చాము. సాంకేతిక రంగాన్ని బలోపేతం చేయాలంటే ముందుగా విద్యారంగంపై దృష్టి పెట్టాలి. అమెరికన్ల సామర్థ్యాన్ని తక్కువగా అంచనా వేయరాదు,'' అని హేలీ స్పష్టం చేశారు.
వివరాలు
హెచ్1బీ వీసా నాన్‌ ఇమిగ్రెంట్ వర్గంలోకి..
మాజీ అధ్యక్షుడు జో బైడెన్ (Joe Biden) కార్యవర్గం విదేశీ నిపుణులను నియమించుకొనే నిబంధనలను సడలించింది. తద్వారా, ఎఫ్-1 విద్యార్థి వీసాలను హెచ్1బీ వీసాలుగా మార్చుకోవడం సులభం అయింది. ఇది లక్షలాది భారతీయ నిపుణులకు ప్రయోజనం కల్పిస్తోంది. హెచ్1బీ వీసా నాన్‌ ఇమిగ్రెంట్ వర్గంలోకి వస్తుంది. ముఖ్యంగా టెక్నాలజీ కంపెనీలు విదేశీ నిపుణులను నియమించుకునేందుకు ఈ వీసాను ఉపయోగిస్తున్నాయి. భారత్, చైనా దేశాలకు ఈ వీసా ద్వారా మరింత ప్రయోజనం కలుగుతోంది.