Donald Trump: భారత్‌పై మరోసారి ట్రంప్ భారీ సుంకాల బెదిరింపు - 24 గంటల్లో అమలులోకి?
ఈ వార్తాకథనం ఏంటి
భారతదేశంపై దిగుమతి సుంకాల పెంపు విషయంలో అమెరికా అధ్యక్షుడు డొనాల్డ్ ట్రంప్ మళ్లీ తన ఆగ్రహాన్ని బయటపెట్టారు. రానున్న 24 గంటల్లో భారత్‌పై విధించే సుంకాలను భారీగా పెంచనున్నట్లు ఆయన వెల్లడించారు. ఓ అంతర్జాతీయ మీడియా సంస్థకు ఇచ్చిన ఇంటర్వ్యూలో, రష్యా నుండి చమురు కొనుగోలుతో ఉక్రెయిన్‌పై జరుగుతున్న యుద్ధానికి పరోక్షంగా భారతదేశం సహకరిస్తోందని విమర్శలు గుప్పించారు. ఇదివరకే ట్రూత్ సోషల్ మాధ్యమం ద్వారా ఇదే విషయాన్ని ఆయన పంచుకున్న విషయం తెలిసిందే.
వివరాలు
వచ్చే 24 గంటల్లో ఈ సుంకాల రేటును గణనీయంగా పెంచుతున్నాం: ట్రంప్
ట్రంప్ వ్యాఖ్యల్లో, ''వాణిజ్య పరంగా భారతదేశం మాకు నిజమైన భాగస్వామిగా లేదు. వారు అమెరికా నుంచి భారీ స్థాయిలో దిగుమతులు చేసుకుంటున్నారు. కానీ మేము మాత్రం అదే స్థాయిలో ఎగుమతులు చేయలేకపోతున్నాం.అందుకే ఇప్పటికే 25 శాతం సుంకాలు విధించాం.కానీ ఇది తక్కువే. వచ్చే 24 గంటల్లో ఈ సుంకాల రేటును గణనీయంగా పెంచుతున్నాం. రష్యా నుంచి భారత్ కొనుగోలు చేస్తున్న చమురు వలన ఉక్రెయిన్‌పై జరిగే యుద్ధానికి పరోక్షంగా మద్దతు లభిస్తోంది,'' అని ట్రంప్ ఆగ్రహంతో వ్యాఖ్యానించారు.
వివరాలు
అమెరికా వైఖరిపై తీవ్రంగా స్పందించిన రష్యా
ఇదిలా ఉండగా, రష్యా నుంచి ఇంధన వస్తువుల దిగుమతిపై అమెరికా సహా ఐరోపా దేశాల అభ్యంతరాలను భారత ప్రభుత్వం ఇప్పటికే తేల్చిచెప్పింది. అణు ఇంధనం, ఎలక్ట్రిక్ వాహనాల ఉత్పత్తికి అవసరమైన ఖనిజాలు, ఎరువుల తయారీకి అవసరమైన పదార్థాల కోసం రష్యా నుంచి దిగుమతులు చేయడాన్ని భారత ప్రభుత్వం సమర్థించగా, అదే సమయంలో అమెరికా మాత్రం అదే చర్యలను తాము తీసుకుంటున్నప్పుడు ప్రశ్నించాల్సిన అవసరం ఉందని భారత్ వ్యాఖ్యానించింది. ఇక రష్యా కూడా అమెరికా వైఖరిపై తీవ్రంగా స్పందించింది. భారత్‌పై వాణిజ్య ఒత్తిడిని పెంచడం సమంజసం కాదని మండిపడింది. అన్ని సార్వభౌమ దేశాలకు తమ వాణిజ్య భాగస్వాములను స్వేచ్ఛగా ఎంపిక చేసుకునే హక్కు ఉందని స్పష్టం చేసింది.