Fields Medal: చరిత్ర సృష్టించిన చైనా గణితవేత్తలు.. ప్రపంచ అత్యున్నత అవార్డు సొంతం
ఈ వార్తాకథనం ఏంటి
ప్రపంచ గణితశాస్త్రంలో అత్యున్నత గౌరవంగా భావించే ఫీల్డ్స్ మెడల్ను ఈసారి తొలిసారిగా ఇద్దరు చైనా గణిత శాస్త్రవేత్తలు అందుకొని చరిత్ర సృష్టించారు. చైనా అకాడెమిక్లు హాంగ్ వాంగ్, యు డెంగ్లతో పాటు అమెరికాకు చెందిన జాన్ పార్డన్, కెనడాకు చెందిన జాకబ్ ట్సిమెర్మన్ కూడా ఈ ప్రతిష్ఠాత్మక పురస్కారాన్ని అందుకున్నారు. విజేతలకు ఒక్కొక్కరికి 15 వేల కెనడియన్ డాలర్ల నగదు బహుమతిని ప్రకటించారు. 100 ఏళ్లకు పైగా గణిత శాస్త్రవేత్తలను సవాలు చేసిన సమస్యలకు పరిష్కారం చూపినందుకుగానూ హాంగ్ వాంగ్, యు డెంగ్లను ఈ గౌరవానికి ఎంపిక చేశారు. అమెరికా వేదికగా గురువారం జరిగిన కార్యక్రమంలో ఈ అవార్డులను ప్రదానం చేశారు.
వివరాలు
ఈ గౌరవం అందుకున్న మూడో మహిళా గణిత శాస్త్రవేత్తగా హాంగ్ వాంగ్
హాంగ్ వాంగ్ ఈ గౌరవం అందుకున్న మూడో మహిళా గణిత శాస్త్రవేత్తగా నిలిచారు.
ప్రస్తుతం ఆమె అమెరికాలోని న్యూయార్క్ యూనివర్సిటీతో పాటు ఫ్రాన్స్లోని ఇన్స్టిట్యూట్ డెస్ హాట్స్ ఎట్యూడ్స్ సైంటిఫిక్స్ (IHES)లో ప్రొఫెసర్గా పనిచేస్తున్నారు.
ఆమె సహచరుడు జోష్ జాల్తో కలిసి 1917లో జపాన్ గణిత శాస్త్రవేత్త సోయిచి కాకేయా ప్రతిపాదించిన ప్రసిద్ధ "కాకేయా సమస్య"కు కీలక పరిష్కారం చూపారు.
ఒక పెన్సిల్ను పూర్తిగా తిప్పినప్పుడు అది ఆక్రమించే కనిష్ఠ విస్తీర్ణం ఎంత అనే ప్రశ్నకు త్రిమితీయ (3D) దృక్కోణంలో విశ్లేషణ చేసి సమాధానం కనుగొన్నారు.
ఈ పరిశోధనను గత ఏడాది ప్రచురించారు.
వివరాలు
"హిల్బర్ట్ ఆరో సమస్య"కు సంబంధించి విశేష పరిశోధన
మరో విజేత యు డెంగ్ 1900లో జర్మనీకి చెందిన ప్రముఖ గణిత శాస్త్రవేత్త డేవిడ్ హిల్బర్ట్ ప్రతిపాదించిన "హిల్బర్ట్ ఆరో సమస్య"కు సంబంధించి విశేష పరిశోధన చేశారు.
అనేక సూక్ష్మ కణాల కదలిక ఆధారంగా మొత్తం వ్యవస్థ ప్రవర్తనను ఎలా అంచనా వేయాలనే ప్రశ్నకు వాయువుల ప్రవర్తనను విశ్లేషిస్తూ సమాధానం అందించారు.
ఈ పురస్కారం తనకు లభించడం గొప్ప గౌరవంగా భావిస్తున్నానని డెంగ్ తెలిపారు.
ఈ విజయంతో చైనాలో ఆనందం వ్యక్తమవుతోంది.
"ఫీల్డ్స్ మెడల్","తొలిసారి చైనా గణితవేత్తలకు ఫీల్డ్స్ మెడల్" హ్యాష్ట్యాగ్లు చైనా సోషల్ మీడియా వేదికల్లో మిలియన్ల వ్యూస్ సాధించి ట్రెండింగ్గా నిలిచాయి.
ఇది ప్రతి చైనీయుడి గర్వకారణమని,చారిత్రక ఘట్టాన్నిచూస్తున్నామని నెటిజన్లు వ్యాఖ్యానించారు.
వివరాలు
చైనా గణిత రంగం ఎన్నో దశాబ్దాలుగా ఎదురుచూస్తున్న కల
ప్రముఖ గణిత శాస్త్రవేత్త షింగ్-టంగ్ యావ్ కూడా చైనా గణిత రంగం ఎన్నో దశాబ్దాలుగా ఎదురుచూస్తున్న కల నెరవేరిందని పేర్కొన్నారు.
హాంగ్ వాంగ్ 1991లో చైనాలోని గుయిలిన్లో జన్మించారు. చిన్నప్పుడే రెండు తరగతులు దాటేసి 16 ఏళ్ల వయసులో పెకింగ్ యూనివర్సిటీలో చేరారు.
అనంతరం ఫ్రాన్స్లోని పారిస్-సుడ్ యూనివర్సిటీ,ఎకోల్ పాలిటెక్నిక్లలో చదివి,అమెరికాలోని ఎంఐటీలో డాక్టరేట్ పూర్తి చేశారు.
ఫీల్డ్స్ మెడల్ అందుకున్న సందర్భంగా ఫ్రాన్స్ అధ్యక్షుడు ఇమ్మాన్యుయేల్ మాక్రాన్ స్వయంగా ఫోన్ చేసి అభినందించారు.
వివరాలు
నోబెల్ బహుమతితో సమానమైన అత్యున్నత గౌరవంగా ఫీల్డ్స్ మెడల్
యు డెంగ్ కూడా పెకింగ్ యూనివర్సిటీలో విద్యనభ్యసించి, తర్వాత ఎంఐటీ, ప్రిన్స్టన్ యూనివర్సిటీల్లో ఉన్నత విద్య పూర్తి చేశారు.
ప్రస్తుతం అమెరికాలోని చికాగో యూనివర్సిటీలో గణితశాస్త్ర ప్రొఫెసర్గా సేవలందిస్తున్నారు.
ప్రతి నాలుగేళ్లకోసారి 40 ఏళ్లలోపు అసాధారణ ప్రతిభ కనబరిచిన గణిత శాస్త్రవేత్తలకు ఫీల్డ్స్ మెడల్ ప్రదానం చేస్తారు.
గణితశాస్త్రంలో ఇది నోబెల్ బహుమతితో సమానమైన అత్యున్నత గౌరవంగా ప్రపంచవ్యాప్తంగా గుర్తింపు పొందింది.