Stock market crash: భారీ నష్టాల్లో ముగిసిన దేశీయ స్టాక్‌మార్కెట్‌ సూచీలు.. సెన్సెక్స్‌ 1400 పాయింట్లు,నిఫ్టీ 400 పాయింట్లకు పైగా పతనం!
ఈ వార్తాకథనం ఏంటి
దేశీయ స్టాక్‌ మార్కెట్‌ సూచీలు తీవ్ర నష్టాలతో ముగిశాయి. అంతర్జాతీయ మార్కెట్లలో వచ్చిన బలహీన సంకేతాలు,బ్యాంకింగ్‌, ఐటీ రంగాల్లో భారీ అమ్మకాల ఒత్తిడి కారణంగా సూచీలు గణనీయంగా పడిపోయాయి.
సెన్సెక్స్‌ 1,400 పాయింట్లకు పైగా నష్టపోయి,నిఫ్టీ 22,200 దిగువకు చేరింది.
స్మాల్‌క్యాప్‌, మిడ్‌క్యాప్‌ స్టాక్స్‌లో కూడా అమ్మకాలు వెల్లువెత్తాయి. ఆసియా మార్కెట్లలో సియోల్‌, టోక్యో, షాంఘై, హాంకాంగ్‌ సూచీలు భారీ నష్టాల్లో ముగిశాయి.
మార్కెట్‌ పతనంతో మదుపర్ల సంపద దాదాపు రూ.9 లక్షల కోట్ల మేరకు ఆవిరైంది, బీఎస్‌ఈలో నమోదిత కంపెనీల మొత్తం విలువ రూ.384 లక్షల కోట్లకు చేరింది.
వివరాలు
మార్కెట్‌ సూచీల ప్రదర్శన
సెన్సెక్స్‌ ఉదయం 74,201.77 పాయింట్ల వద్ద (మునుపటి ముగింపు 74,612.43) నష్టాలతో ప్రారంభమైంది.
ట్రేడింగ్‌ మొత్తం నష్టపరిణామాలతోనే కొనసాగింది. ఇంట్రాడేలో 73,141.27 పాయింట్లను కోల్పోయిన సూచీ, చివరికి 1,414.33 పాయింట్ల నష్టంతో 73,198.10 వద్ద స్థిరపడింది.
నిఫ్టీ కూడా 420.35 పాయింట్లు నష్టపోయి 22,124.70 వద్ద ముగిసింది. రూపాయి మారకం విలువ డాలర్‌తో పోలిస్తే 33 పైసలు నష్టపోయి 87.51 వద్ద ముగిసింది.
సెన్సెక్స్‌ 30 సూచీల్లో హెచ్‌డీఎఫ్‌సీ బ్యాంక్‌ను మినహాయిస్తే మిగిలిన అన్ని షేర్లు నష్టాల్లో ముగిశాయి.
ముఖ్యంగా టెక్‌ మహీంద్రా, ఇండస్‌ఇండ్‌ బ్యాంక్‌, మహీంద్రా అండ్‌ మహీంద్రా, భారతీ ఎయిర్‌టెల్‌, ఇన్ఫోసిస్‌ వంటి స్టాక్స్‌ భారీ నష్టాలను చవిచూశాయి.
వివరాలు
మార్కెట్‌ పతనానికి ప్రధాన కారణాలు
అంతర్జాతీయ మార్కెట్లో బ్రెంట్‌ క్రూడ్‌ బ్యారెల్‌ ధర 73 డాలర్ల వద్ద ట్రేడవుతుండగా, బంగారం ఔన్సు 2,874 డాలర్ల వద్ద కొనసాగుతోంది.
అమెరికా అధ్యక్షుడిగా ట్రంప్‌ ఎన్నికైనప్పటి నుండి స్టాక్‌ మార్కెట్లో అనిశ్చితి కొనసాగుతోంది.
ట్రంప్‌ తీసుకొస్తున్న కొత్త టారిఫ్‌ విధానాలు వాణిజ్య యుద్ధ భయాలను రేకెత్తిస్తున్నాయి.
మెక్సికో, కెనడాపై విధించిన సుంకాలు మార్చి 4 నుండి అమల్లోకి వస్తాయని ప్రకటించారు.
యూరోపియన్‌ యూనియన్‌పైనా 25% సుంకాలు విధిస్తానని ట్రంప్‌ పేర్కొన్నారు.
వివరాలు
దేశీయ బ్యాంకింగ్‌ రంగం బలహీనత
భారత బ్యాంకుల నాలుగో త్రైమాసిక ఫలితాలు బలహీనంగా నమోదవుతాయని అంచనాలు ఉన్నాయి.
క్యూ3 ఫలితాలు నిరాశపరచిన నేపథ్యంలో, క్యూ4 ఫలితాలపై మరింత ఆందోళన నెలకొంది.
విదేశీ మదుపర్ల అమ్మకాలు
విదేశీ సంస్థాగత మదుపర్లు (FIIs) భారత మార్కెట్లో అమ్మకాలను కొనసాగిస్తున్నారు.
ఇంతకాలం దేశీయ సంస్థాగత మదుపర్లు (DIIs) మార్కెట్లను నిలబెట్టినప్పటికీ, ఇప్పుడు వారు కూడా కొంత సంకోచంగా వ్యవహరిస్తున్నారు.
వివరాలు
చైనా మార్కెట్‌ ఆకర్షణ
చైనా ప్రభుత్వం ప్రైవేటు వ్యాపారాలకు అనుకూలంగా మారుతుండటంతో, ఎఫ్‌ఐఐలు (FIIs) చైనా స్టాక్స్‌ వైపుకు ఆకర్షితులవుతున్నారు.
చైనా స్టాక్స్‌ తక్కువ వాల్యూషన్‌లో లభిస్తుండటంతో పాటు, చైనా ఆర్థిక వ్యవస్థ బలంగా పుంజుకుంటుందన్న అంచనాలు విదేశీ పెట్టుబడిదారులను చైనా వైపుకు మళ్లిస్తున్నాయి.