Swiggy: 400 నగరాలకు స్విగ్గీ.. 10 నిమిషాల ఫుడ్ డెలివరీ సర్వీస్ 'బోల్ట్'సేవలు విస్తృతం
ఈ వార్తాకథనం ఏంటి
ప్రముఖ ఫుడ్ డెలివరీ సేవల సంస్థ స్విగ్గీ (Swiggy), తన 10 నిమిషాల ఫుడ్ డెలివరీ సేవ అయిన 'బోల్ట్' (Swiggy Bolt) ను మరిన్ని నగరాలలో అందుబాటులోకి తీసుకొచ్చింది. తాజాగా, ఈ సేవ 400 నగరాలు, పట్టణాలకు వ్యాపించిందని సోమవారం ఒక ప్రకటనలో కంపెనీ తెలిపింది. మొదట బెంగళూరు, చెన్నై, హైదరాబాద్‌, ఢిల్లీ, ముంబయి, పుణె వంటి పెద్ద నగరాలలో అందుబాటులో ఉన్న ఈ సేవ, ఇప్పుడు జైపూర్‌, లఖ్నవూ, అహ్మదాబాద్‌, ఇందౌర్‌, కోయంబత్తూర్‌ వంటి నగరాలకు కూడా విస్తరించింది. అలాగే, గుంటూరు, వరంగల్‌, జగిత్యాల, రూర్కీ, నాసిక్‌ వంటి టైర 2, టైర 3 పట్టణాల్లో కూడా 10 నిమిషాల్లో ఫుడ్ డెలివరీ అందుబాటులోకి రానుంది.
వివరాలు
ఈ సేవకు అదనపు ప్రోత్సాహకాలు ఉండవు
స్విగ్గీ, 'బోల్ట్' సేవలో ముఖ్యంగా తయారీకి తక్కువ సమయం తీసుకునే లేదా ముందుగా తయారైన ఆహార పదార్థాలను అందిస్తామని తెలిపింది. ఈ ఆర్డర్లను ప్రాధాన్యతగా తీసుకొని రెస్టారెంట్లతో భాగస్వామ్యాలు ఏర్పాటు చేస్తున్నామని పేర్కొంది. అయితే, డెలివరీ బాయ్స్‌ భద్రత దృష్టిలోకి తీసుకుంటూ, వారికి 'బోల్ట్' డెలివరీ వివరాలు తెలియజేయడం లేదని కంపెనీ స్పష్టం చేసింది. అలాగే, ఈ సేవకు అదనపు ప్రోత్సాహకాలు ఉండవని, ప్రస్తుతానికి 2 కిలోమీటర్ల పరిధిలో మాత్రమే ఈ సేవలు అందుబాటులో ఉంటాయని, భవిష్యత్‌లో దీనిని మరింత విస్తరించాలని సూచించింది.